अर्घाखाँची । अर्घाखाँचीमा आजदेखी पाँचौं संस्करणको अर्घाखाँची प्रिमियर लिग (एपिएल) क्रिकेट प्रतियोगिता हुने भएको छ ।सन्धिखर्कस्थित टुँडिखेलमा हुने प्रतियोगिताको सबै तयारी पुरा भएको अर्घाखाँची क्रिकेट संघले जनाएको छ ।
मैदानमा सरसफाइ, पिचको तयारी र अन्य अफिशियल कुराहरुको तयारी सकिएको अर्घाखाँची क्रिकेट संघका जिल्ला अध्यक्ष ऋषिकेश भट्टराईले जानकारी दिए ।
प्रतियोगितामा सुपर सुपा ईलेभेन, सौजन्य समाज किमडाँडा, ईलेभेन ब्रदर्स डिभर्ना र रोयल सन्धिखर्क गरी चार टिमको सहभागिता रहने छ । प्रतियोगिताको विजेताले नगद १ लाख तथा उपविजेताले नगद ५० हजारसहित ट्रफी,मेडल र प्रमाणपत्र पाउने छन् ।
साथै प्रतियोगितामा म्यान अफ द म्याच, बेस्ट ब्याट्समेन अफ द टुर्नामेन्ट, बेस्ट बलर अफ द टुर्नामेन्ट, ईमर्जिङ्ग प्लेयर अफ द टुर्नामेन्ट, अलराउन्डर प्लेयर अफ द टुर्नामेन्टका लागी पनी नगद र प्रमाणपत्र प्रदान गरिने छ । खेललाई रोमाञ्चक बनाउन अन्य विधाहरुमा पनि पुरस्कार राशीहरु घोंषण गरिएको छ ।
शतक प्रहार गर्ने प्रत्येक खेलाडीलाई नगद १० हजार, अर्धशतक प्रहार गर्ने प्रत्येक खेलाडीलाई ५ हजार, लगातार ६ छक्का प्रहार गर्ने खेलाडीलाई ६ हजार, लगातार ६ चौका प्रहार गर्ने खेलाडीलाई ४ हजार, ह््याट्रिक विकेट लिने खेलाडीलाई ३ हजार, एक खेलमा १० वा त्यो भन्दा बढी छक्का प्रहार गर्ने खेलाडीलाई ५ हजार र दर्शक दिर्घामा क्याच गर्ने दर्शकलाई नगद ५ सय दिईने आयोजकले जनाएको छ ।
पहाडी जिल्लाहरुमध्ये अर्घाखाँचीमा क्रिकेटको क्रेज बढ्दो छ । अर्घाखाँचीबाट सौरभ खनाल, विक्रम भुसाल, देव खनाल, उत्तम थापा मगर लगायतले राष्ट्रिय टोलीबाट खेलीसकेका छन् ।
