लुम्बिनी विकास कोषले रामग्रामदेखि लुम्बिनीसम्म बिजुली बस चलाउनु सकारात्मक छ । बौद्ध स्थलहरुको एकीकृत पर्यटन प्रवद्र्धन कार्यक्रम चलाउन दबाब परिरहेका बेला कोषले गरेको यो निर्णयले लुम्बिनीलाई आसपासका बौद्धस्थलमा पर्यटन प्रवद्र्धन गर्न बल पु¥याउने छ ।
बौद्धमार्गीहरुका लागि बुद्ध जन्मस्थल लुम्बिनी जत्तिकै महत्वपूर्ण छ, रामग्राम । बुद्धको अस्तुधातु रहेको रामग्राम स्तुपलाई बौद्धमार्गीहरु श्रद्धा राख्छन् । कपिलवस्तु बुद्धले २९ वर्ष बिताएको स्थल हो । सिद्धार्थ गौतमभन्दा अघिका दुई बुद्धको जन्मले पनि कपिलवस्तु महत्वपूर्ण मानिन्छ । बुद्धसँग सम्बन्धित दर्जन विभिन्न स्थल रहेकाले कपिलवस्तुलाई खुला संग्रहालय मानिन्छ । अहिले लुम्बिनीमा आएका पर्यटकका लागि कपिलवस्तु, रामग्राम र देवदह पुग्न असहज भइरहेका बेला लुम्बिनी विकास कोषले बिजुली बस चलाएर लुम्बिनी आएका पर्यटकलाई रामग्राम, देवदह र कपिलवस्तु लैजाने अगुवाइ गरेको छ । कोषको यो अभियानले पर्यटक आवागमन विस्तार हुनेछ । लुम्बिनी आएका पर्यटक आसपासका बौद्ध स्थल घुमफिर गर्न पाउँदा उनीहरुको बसाइ लम्बिन सक्छ ।
अहिले साताको तीन दिन लुम्बिनी–रामग्राम बिजुली बस सेवा चल्ने कोषका अधिकारीहरुले जनाएका छन् । प्रत्येक दिन बस चल्नुपर्छ । प्रत्येक दिन बस नचल्दा लुम्बिनी आएका पर्यटक बस चल्ने दिन कुरेर रामग्राम जाने साइत हेरेर बस्दैनन् । अहिले मान्छेलाई हरेक विषयमा छिटो–छरितो सेवा आवश्यक परेको छ । छिटोछरितो सेवाको अपेक्षा भइरहेका बेला छरितो सेवाबाट मात्रै लाभग्राहीको चित्त बुझाउन सकिन्छ । एशियाली विकास बैंकको अनुदान सहयोगमा ५ वटा बस र १४ वटा विद्युतीय भ्यान संस्कृति, पर्यटन तथा नागरिक उड्डयन मन्त्रालयले २०७९ जेठमा लुम्बिनी विकास कोषलाई दिएको थियो । सेतो नम्बर प्लेटका ती बस र भ्यान त्यत्तिकै थन्किरहेका बेला पर्यटक बोक्न प्रयोग गरेर सदुपयोग गरेको छ ।
दातृ निकायले दिएका सामग्रीको सदुपयोग हुनुको साटो त्यत्तिकै खेर जाने जोखिम बढिरहेका बेला कोषले सदुपयोगको बाटो रोजेको छ । रामग्राम–लुम्बिनी यातायात सेवालाई अझ विस्तार गर्दै जानुपर्छ, जसले लुम्बिनीसहित बौद्ध स्थलहरुको पर्यटकीय विकासमा सघाउ पु¥याउने छ ।
