तिलोत्तमा । हालै गठन भएको तिलोत्तमा राइडर्सले जर्सी अनावरण (लन्च) गरेको छ ।
शनिबार ड्राइभरटोलमा एक औपचारिक कार्यक्रमका बीच तिलोत्तमा नगर खेलकुद विकास समितिका अध्यक्ष लोक पुन र तिलोत्तमा राइडर्सका अध्यक्ष अर्जुन गुरुङ लगायतले जर्सी लन्च गरेका हुन् ।
सो अवसरमा तिलोत्तमा राइडर्समा आवद्ध ३२ जना संस्थापक सदस्यलाई जर्सी प्रदान गरिएको छ । कार्यक्रममा बोल्दै नगर खेलकुद विकास समिति अध्यक्ष पुनले नागरिकलाई स्वस्थ राख्न साइक्लिङ धेरै महत्वपूर्ण हुने बताए ।
उनले तिलोत्तमा राइडर्सले गरेको काम सराहनीय रहेको भन्दै नगरभित्र हरेक विधाका खेलको विकासका लागि वजेट विनियोजन र ग्रास रुट लेभल बाटै प्रशिक्षण जरुरी रहेको बताए ।
तिलोत्तमा राइडर्सका अध्यक्ष अर्जुन गुरुङले स्वास्थ्यका लागि खेलकुद, राष्ट्रका लागि खेलकुद नारा अनुसार नगरमा तिलोत्तमा राइडर्स स्थापना गरिएको भन्दै यसलाई भविष्यमा १७ वटै वडामा विस्तारमा गर्ने लक्ष्य रहेको बताए ।
उनले तिलोत्तमामा साइक्लिङलाई प्रवद्र्धन गर्न र नगरको पर्यटन प्रवद्र्धन गर्न हरेक वडामा साइकल राइड कार्यक्रम छिटै सञ्चालन गर्ने बताए । कार्यक्रम तिलोत्तमा राइडर्सका सचिव बरुण ज्ञवालीले सञ्चालन गरेका थिए ।
क्लबका संस्थापक सदस्य सुवास थापाले छिटै नयां कार्यसमिति गठन गरी विधिवतरुपमा अघि बढ्ने तयारीमा रहेको बताए । जर्सी लञ्च कार्यक्रममा दुईजनाले आजीवन सदस्यता लिएका थिए ।
