बुटवल । बुटवलको मणिमुकुन्द कलेज र कलेजका विद्यार्थीहरुले संयुक्तरुपमा सामुदायिक विद्यालयका विद्यार्थीर शिक्षकलाई न्यानो कपडा वितरण गरेका छन् ।
उनीहरुले पाल्पाको तिनाउ गाउंपालिका वडा नं २ नुवाकोटस्थित रुपा प्राथमिक विद्यालयमा अध्ययनरत विद्यार्थी र शिक्षक शिक्षिकालाई विद्यालयमै पुगेर ट्रयाकसुट सेट,कापी र कलम वितरण गरेका हुन् ।
सो अवसरमा बोल्दै मणिमुकुन्द कलेजका प्राचार्य टुक बहादुर क्षेत्रीले सामाजिक उत्तरदायित्व अन्तर्गत मानवीय सेवाको भावनाले कलेजका कक्षा ११, १२ र स्नातक तहका विद्यार्थीले खाजा खर्चबाट बचाएको रकमबाट राहतस्वरुप सामुदायिक विद्यालयमा न्यानो कपडा वितरण गरिएको बताए ।
संस्थाले विद्यार्थीको सर्वाङगीण विकासका लागि शैक्षिक गुणस्तर अभिबृद्धिसंगै सामाजिक क्रियाकलाप, खेलकुद र अतिरिक्त क्रियाकलापलाई पनि उत्तिकै प्राथमिकतामा राखेर अघि बढेको सहप्राचार्य दिवाकर खनालले बताए ।
संस्थाका सञ्चालक समिति सदस्य उमापति न्यौपानेले कलेजले यसअघि पनि नवलपरासीको सुस्ता लगायतका ठाउंमा पुगेर राहत वितरण गरेको बताए । रुपा प्राथमिक विद्यालयका पुर्व अध्यक्ष जुद्धबहादुर थापा, प्रधानाध्यापक प्रेमकुमार पौड्यालले विद्यालयमा अधिकांश विपन्न परिवारका विद्यार्थीले पढ्ने भएकाले यस्ता राहतले उनीहरुलाई पढाईमा हौसला मिल्ने बताए ।
कार्यक्रममा कलेजका व्यवस्थापन संयोजक पशुपति चौधरी, बीबीएस संयोजक दिनेश पाण्डे लगायतले बोल्दै मणिमुकुन्दका विद्यार्थीको सामाजिक र परोपकारी कार्यले छुट्टै आनन्द मिलेको भन्दै भविष्यमा पनि विद्यार्थीहरुसंग मिलेर संस्थाले आवश्यक ठाउंमा सहयोग गर्ने बताए ।
