तिलोत्तमा । तिलोत्तमा–३ स्थित बुटवल पब्लिक स्कूलले २२औं वार्षिकोत्सव मनाएको छ । २२औं वार्षिकोत्सवको अवसरमा तिलोत्तमा ११ बेलडाँडामा १५ करोड लागतमा स्कूलले निर्माण गरेको रिसर्च एण्ड स्पोर्टस् सेन्टर (स्टेडियम)को उद्घाटन गरिएको छ ।
फुटबल र क्रिकेट मैदान, स्वीमिङ पुल र टनेलसहितको उक्त स्टेडियम २ बिघा जग्गामा बनेको छ । स्टेडियम र वार्षिकोत्सव उद्घाटन गर्दै तिलोत्तमा नगरपालिकाका मेयर रामकृष्ण खाँणले बुटवल पब्लिक स्कूलले यस क्षेत्रमै पहिलोपटक करोडौं लगानीमा आफ्नै सुविधासम्पन्न खेल मैदान निर्माण गरेर नमूना उदाहरण पेश गरेको बताए । विभिन्न चुनौती सामना गरेर विद्यालयले उत्कृष्ट नतिजासहित खेल क्षेत्रमा समेत सिर्जनशील र ठूलो योगदान गर्ने गरी स्टेडियम बनाएको बताए ।
उनले निजी विद्यालयले रोजगारी सिर्जना र आर्थिक विकासमा योगदान दिएको भन्दै संस्थागत विद्यालयको लगानीको सुरक्षा नगरपालिकाले गर्ने बताए । उनले तिलोत्तमामा शैक्षिक संस्थामा तालाबन्दी जस्ता आन्दोलन निषेध गरिएको भन्दै कसैले तालाबन्दी गरे नगरपालिकाले ताला खोल्ने बताए ।
कार्यक्रममा बोल्दै संस्थाका संस्थापक अध्यक्ष हेमलाल शर्मा भुसाल र सह–प्राचार्य रामचन्द्र पौडेलले शिक्षामा आधुनिक प्रयोग गर्दै डिजिटल, अनुसन्धानमूलक, व्यावहारिक, विद्यार्थी केन्द्रित र झोला रहित (ब्यमगलेस) शिक्षण सिकाइलाई अवलम्बन गरेको बताए ।
सो अवसरमा तिलोत्तमा ११ का वडाध्यक्ष विष्णु बराल, रुपन्देहीका पूर्व जिशिअ टेकबहादुर थापा, अभिभावक संघका हेम थापा, विद्यार्थीहरु सुवोध ज्ञवाली र श्रीषा न्यौपानले बुटवल पब्लिक स्कूल गुणस्तरीय शिक्षा र आफ्नै खेल मैदानका कारण विद्यार्थी र अभिभावकको रोजाइमा परेको बताए । सो अवसरमा शिक्षा क्षेत्रको विकासमा पत्रकारितामार्फत् योगदान पु¥याएवापत दैनिक लुम्बिनीका सह–सम्पादक टिआर शर्मासहित पत्रकार सन्जु पौडेल र कपिल ज्ञवालीलाई सम्मान पत्र प्रदान गरिएको थियो । यस्तै सामाजिक क्षेत्रमा योगदान गरेवापत सिद्धार्थ बाल गृह, देवदहकी कल्याणी पौडेल र इञ्जिनियर सन्तोष आचार्यलाई पनि सम्मान पत्र प्रदान गरिएको थियो । कक्षा १२ सम्म पढाइ हुने विद्यालयमा करिब १२ सय विद्यार्थी छन् ।
