तिलोत्तमा । प्रजातन्त्र दिवसको अवसरमा तिलोत्तमा–१ मा अन्तर आमा समूह सेभेन ए साइड फुटबल प्रतियोगिता सम्पन्न भएको छ ।
नगरपालिकामै पहिलोपटक आमा समूहबीच गराइएको उक्त प्रतियोगितामा ६ वटा टिमले भाग लिएका थिए । प्रतियोगितामा न्यू संगम आमा समूह टिम क प्रथम र दुर्गा वैदिक जागरण धार्मिक समूह दोस्रो भएका छन् ।
उत्कृष्ट खेलाडी न्यू संगम आमा समूहकी बबिता पाण्डेय, अनुशासित टिम जागृत आमा समूह भएका छन् । विजेता टिमले क्रमशः १० हजार र ५ हजार नगद तथा प्रमाणपत्र पाएका छन् । प्रतियोगिताको उद्घाटन गर्दै तिलोत्तमाकी उपप्रमुख जगेश्वरदेवी चौधरीले महिलाहरुलाई स्वस्थ बनाउन यस्ता खेलकुद प्रतियोगितामा सहभागी गराउनु धेरै राम्रो काम भएको बताइन् । कार्यक्रममा तिलोत्तामा १ का वडाध्यक्ष फर्सुराम गिरी, वडा सचिव हेमलाल न्यौपाने, कार्यक्रम संयोजक मिलन राना लगायतले पुरस्कार तथा प्रमाणपत्र वितरण गरेका थिए ।
