खुला सीमाबाट कुखुरा र मासु अवैध आयात हुँदा नेपाली कुखुरापालक किसान मारमा परेका छन् । भन्सार कार्यालय र सीमा क्षेत्रमा रहेका सुरक्षा निकायका चौकीहरुको बेवास्ताले अवैध आयात मौलाएको छ । भारतबाट ठूलो परिमाणमा आयात भएपछि नेपाली किसानको कुखुराले मूल्य नपाउने अवस्था आएको छ ।
भारतमा दाना, औषधिलगायत सस्तो हुँदा उत्पादन लागत नेपालमा भन्दा थोरै छ । भारतमा भन्दा धेरै उत्पादन लागत भएको कुखुरा उत्पादन गरेर भारतीय कुखुरासँग प्रतिस्पर्धा गर्न नेपाली किसानलाई कठिन छ । अवैध आयात भएको सस्तो कुखुरासँग प्रतिस्पर्धा गर्न नसक्दा पेशाबाटै पलायन हुनुको विकल्प छैन । कुखुरा पालेर जीविकोपार्जन गरेका युवा अन्ततः रोजगारीको लागि खाडी मुलुकतिरै जानुपर्ने बाध्यता छ । अवैध आयात रोक्दा नेपाली किसानले राहत पाउँछन्, युवाको बढ्दो पलायनलाई रोक्ने अवसर पनि हो ।
कुखुरापालक किसान संघ रूपन्देहीका अनुसार, रूपन्देहीमा दैनिक तीनसय क्वीन्टल कुखुरा भारतबाट अवैध रुपमा भित्रिएको छ । बर्डफ्ल्यूले कुखुरा व्यवसाय जोखिममा परेर धेरै युवा पलायन भए । त्यसपछि कोभिडले पनि कुखुरा पालनबाट पलायन गरायो । अहिले जेनतेन धानिएको व्यवसाय मारमा पर्दा अवैध आयात रोक्न अभियान चलाएका छन्, उनीहरुको यो अभियान स्वाभाविक छ । प्रहरीले निगरानी गर्न नसक्दा अवैध आयात भएकोले प्रहरीकै सहयोगी भइ निगरानी गर्न ध्यान दिनुपर्छ । अवैध आयात रोक्न भन्दै थालिएको अभियानलाई कानुन हातमा लिने औजारको रुपमा प्रयोग गर्न हुन्न ।
कुखुराको मासु र अण्डा निर्वाध आयात हुँदा त्यसले बर्डफ्ल्यूको जोखिम हुनसक्छ । विगतमा बर्डफ्ल्यूको महामारीका बेला आयात नियन्त्रण गरिएको थियो । बर्डफ्ल्यूविरुद्धको अभियानका बेला भारतीय सेतो अण्डा नियन्त्रण गरिएको थियो । भारतीय अण्डा आयात बन्द हुँदा नेपाल अण्डामा आत्मनिर्भर भयो । कुखुराको अवैध आयात रोक्न बेवास्ता गर्ने हो कुखुरापालन व्यवसाय धराशायी हुन्छ नै, अरु क्षेत्रमा पनि अवैध आयात मौलाउँदै जानेछ, जसको असर चौतर्फी पर्ने निश्चित छ । अवैध आयात निर्यातले अपराध मौलाउँछ । समाजमा शान्ति सुरक्षामा चुनौती हुन्छ । समाजमा अपराध नियन्त्रण गर्न पनि अवैध आयात निर्यात रोक्न ध्यान दिनुपर्छ ।
