तिलोत्तमा । रुपन्देहीको सिद्धार्थनगर –८ र मायादेवी गाउंपालिका–८ को सिमानामा  लुम्बिनी रोड नजिकै रहेको सिद्धार्थ बाल गृहलाई बुटवल पब्लिक स्कूल तिलोत्तमा–३ ले आर्थिक सहयोग गरेको छ । २२ औं वार्षिकोत्सवको अवसरमा तिलोत्तमा नगरपालिकाका प्रमुख रामकृष्ण खांण र विद्यालयका संस्थापक अध्यक्ष हेमलाल शर्मा भुसालले बाल गृहकी सञ्चालक कृष्णमाया गुरुङलाई १५ हजार रुपैया प्रदान गरेका हुन् । सो अवसरमा अनाथ बालबालिकाको पालनपोषण र शिक्षा दिक्षा दिएर सामाजिक क्षेत्रमा योगदान गरेवापत बालगृहकी सञ्चालक कृष्णमाया गुरुङलाई कदरपत्रले सम्मान गरिएको थियो । 
विद्यालयको सहयोग र सम्मानले आफूलाई मानवीय सेवामा खटिन हौसला मिलेको गुरुङले बताइन् ।  सम्मान पाउंदा उनी भावुक बन्दै आंशु थाम्न सकेकी थिइनन् । 
बाल गृहको आफ्नो भवन नहुंदा भाडा तिरेर बस्नुपर्दा आर्थिक अभाव झेल्दै आएको गुरुङले गुनासो गरिन् ।  
स्थानीय तहसंग भवन बनाउने जग्गा माग गर्दै पटक पटक धाएपनि कसैले नदिएको गुरुङको गुनासो छ । बाल गृहमा ७ बालक र १२ बालिका बस्दै आएका गुरुङले बताइन् । आफू समेत ४ जनाले स्वयंसेवीका रुपमा उनीहरुलाई लालनपालन गरिरहेको उनले बताइन् । बाल गृहमा १८ वर्ष उमेर मुनिका बालबालिका बस्दै आएका छन् । 
बुटवल पब्लिक स्कूलका संस्थापक अध्यक्ष हेमलाल शर्मा भुसालले बाल गृहलाई घर भाडा तिर्न आर्थिक अभाव हुने गरेको समस्या थाहा पाएपछि आर्थिक सहयोग गरेको र भविष्यमा पनि सक्दो सहयोग गर्दै जाने बताए ।