पाल्पा । तीन दिनदेखि पाल्पा संसारकोट डाँडाको जंगल क्षेत्रमा लागेको डढेलो बिहीबारसम्म नियन्त्रणमा आएको छैन । डढेलोले यसको सेरोफेरोमा रहेका चार सामुदायिक वनको १६८ हेक्टर जंगल सखाप भइसकेको छ ।
डिभिजन वन कार्यालय पाल्पाका अनुसार देउरालीको लेक सामुदायिक वनको ६८ मध्ये ५० हेक्टर जंगलमा डढेलो लागिसकेको छ । ४८ हेक्टर क्षेत्रफल रहेको देउराली र ख्याहाको संयुक्त भारेखोला सामुदायिक वनको सम्पूर्ण क्षेत्र डढेलोले सकिएको डिभिजन वन कार्यालयका सूचना अधिकारी खिलबहादुर तामाङले जानकारी दिए ।
यसैगरी ख्याहाकै मधुवन सामुदायिक वन उपभोक्ता समूहको १२० मध्ये ६० हेक्टर क्षेत्रफल डढेलोले सकिएको छ । देउरालीकै वृन्दावन सामुदायिक वनको ३९ मध्ये १० हेक्टर क्षेत्रफलमा डढेलो लागि सकेको छ । ‘भौगोलिक विकटता र हावाहुरीका कारण नियन्त्रणमा लिन कठिनाई भएको छ,’ डिभिजन वनका सूचना अधिकारी तामाङले भने, ‘बस्ती जोगाउने प्रयासबाहेक जंगलमा पुगेर निभाउन सकिने अवस्था छैन ।’
रिब्दीकोट गाउँपालिका–१ को ख्याहा र २ को देउरालीको संसारकोट डाँडामा मंगलबार १ बजेदेखि डढेलो सुरु भएको हो । डढेलो पोखरडाँडा क्षेत्रबाट सल्किएको स्थानीयले बताए । हावाहुरी लागेकाले नियन्त्रणमा लिन कठिनाई भएको रिब्दीकोट गाउँपालिका उपाध्यक्ष कान्ता अधिकारीले बताइन् ।
हार्थोकदेखि देउराली हुँदै ख्याहा जोड्ने सडक अन्तर्गत उत्तर र दक्षिण भागको जंगल क्षेत्रमा भीषण डढेलो लागेको उनले बताइन् । सल्ला, खर, झारपात सुकेको जंगलमा लागेको डढेलो नियन्त्रणमा लिन कठिनाई भएको छ । तानसेन नगरपालिकाको दमकल, नेपाली सेना, सशस्त्र प्रहरी, जनपथ प्रहरी, सब–डिभिजन कार्यालयका कर्मचारी, स्थानीय बासिन्दा, जनप्रतिनिधि डढेलो नियन्त्रणका लागि खटिएको रिब्दीकोट गाउँपालिका–२, देउरालीका वडाध्यक्ष ओमप्रकाश पोखरेलले बताए ।
देउरालीको पोखरडाँडामा बुधबार बेलुकी बस्ती नै जोखिममा परेको भए पनि जोखिममुक्त गराएको रिब्दीकोट–१, का वडाध्यक्ष चिरञ्जीवी पोखरेलले बताए । प्रमुख जिल्ला अधिकारी तोयनारायण सुवेदी, नेपाली सेना महिन्द्र दल गणका प्रमुख भुपेन्द्र गुरुङ्, प्रहरी प्रमुख नरेन्द्र चन्द लगायतको सुरक्षा निकायको टोलीले डढेलो लागेको क्षेत्रको अवलोकन गरेका छन् । डढेलो देउरालीबाट तानसेन नगरपालिका–१४, अर्गलीको माथिल्लो भेगतिर सरेको छ । यस भेगमा बस्तीको जोखिम छैन । खानेपानीको मुहान, टंकी, विद्युत् ट्रान्सफर्मर जोगाएका छन् । हावाहुरी चलेको र विद्युत् ट्रान्सफर्मरमा विद्युत सर्ट भएर निस्केको आगोले जंगलमा डढेलो सुरु भएको डिभिजन वन कार्यालयले जनाएको छ ।
