बुटवल । स्नूकरको अन्तर्राष्ट्रिय प्रतियोगितामा पहिलोपटक नेपाललाई पदक दिाउने बुटवलका खेलाडी रेगन श्रेष्ठलाई नेपाल बिलियर्डस् स्नुकर तथा पुल संघ रूपन्देहीले नगदसहित सम्मान गरेको छ ।
श्रीलंकामा हालै सम्पन्न सागस्तरीय प्रतियोगितामा श्रेष्ठ सेमिफाइनलमा पुग्दै नेपाललाई पहिलो पदक दिलाउन सफल भएका थिए । बुटवलमा एक कार्यक्रमका बीच संघका अध्यक्ष सुजन पुन, प्रथम उपाध्यक्ष बासु प्रधान,महासचिव प्रकाश क्षेत्री लगायतले श्रेष्ठलाई नगद २५ हजार रुपैयां र कदर पत्र सहित सम्मान गरेका हुन् । संघले हालसम्मकै सर्वाधिक पुरस्कार राशीको राष्ट्रियस्तरको स्नूकर प्रतियोगिता सम्पन्न गरेको अवसर पारेर श्रेष्ठलाई सम्मान गरेको हो । फागुन १२ देखि २२ गतेसम्म चलेको प्रतियोगितामा देशभरबाट १२८ खेलाडीलाई सहभागी गराउन संघ सफल भएको थियो । उपाधि विजेतालाई संघले ३ लाख ३ हजार नगद पुरस्कार दिएको थियो ।
संघका अध्यक्ष पुनले रुपन्देही स्नूकर खेलको उर्बरभूमि भएको र यहां तीन सय बढी खेलाडी रहेको उल्लेख गर्दै यो खेललाई राष्ट्रिय खेलकुद प्रतियोगितामा समावेश गर्न र कभर्ड हल निर्माण गरिदिन सरकारसंग माग गरे ।
स्नूकर खेललाई नेपालमा प्रहरी प्रशासनले गलत दृष्टिले हेर्ने गरेको तर अन्तराष्ट्रिय जगतमा यो प्रतिष्ठित खेलमा गणना हुने उनले बताए ।
सम्मानित खेलाडी श्रेष्ठले नेपाल बिलियर्डस् स्नुकर तथा पुल संघ रूपन्देहीले राष्ट्रिय तथा अन्तर्राष्ट्रिय प्रतियोगितामा भाग लिन जांदा संघले आर्थिक सहयोग गरेर प्रोत्साहन गरेकाले आत्मबल बलियो भएको उल्लेख गरे ।
