पाल्पा ढाका कपडाको उत्पादनले चिनिएको छ । पाल्पाली ढाका उपभोक्ताको रोजाइमा पर्दै आएको छ । पाल्पाली ढाका कपडाको बजारीकरण गरी लाभ जति लिनुपर्ने हो, त्यो हुन नसक्दा पाल्पाली ढाका उद्योगहरु फष्टाउन सकेका छैनन् ।
पाल्पाली ढाका उद्योगले अपेक्षित लाभ लिन नसक्नुको कारण बजारीकरणमा सरकारी निकायले सघाउ नगर्दा हो । स्थानीय सरकारले पाल्पाली ढाका कपडाको बजारीकरण र प्रचारप्रसारको लागि काम गर्ने घोषणा गरे पनि कुनै कार्यक्रम अघि सारेको छैन । पाल्पालाई चिनाउने मात्र नभई स्थानीय उद्यमशिलताको विकास र रोजगारी श्रृजनाको लागि पाल्पाली ढाकाले महत्वपूर्ण योगदान गरेको छ । विसं. २०१५ सालदेखि पाल्पामा ढाका कपडा उत्पादन हुँदै आएको छ । त्यसपछि विभिन्न आरोह अवरोह पार गर्दै आएको ढाका उद्योगहरु मजदुरको अभावमा बन्द हुने अवस्थामा पुगेका थिए । उद्योगमा मजदुरको समस्या भएपछि प्रदेश सरकारले उद्योगमा आवश्यक मजदुर पूर्ति गर्नका लागि तीन महिने ढाका बुनाइ तालिम आयोजना ग¥यो । तालिम अवधिभर खान र बस्नका लागि आवश्यक खर्च पूर्तिका लागि श्रमिकको न्यूनतम तलब पनि दिएर तालिम आयोजना गरेकाले तालिम गरिब र सिमान्तकृत समुदायलाई निकै उपयोगी भयो । त्यही तालिमले मृत्युशैयामा पुगेको ढाका उद्योगले पुनर्जीवन पायो । अहिले ढाका उद्योग तङ्ग्रिने अवस्थामा छन् ।
अब खाँचो छ, तहगत सरकारले ब्राण्डिङका लागि आवश्यक कार्यक्रम । ढाका उद्योगीसँग मिलेर प्रदेश सरकारले तालिम आयोजना गरेर दक्ष मजदुर उत्पादन गर्न सहयोग ग¥यो । अब बजारीकरणको लागि सहयोग गर्न आवश्यक छ । तानसेन नगरपालिकाको १५औं नगरसभामा नगरप्रमुख सन्तोषलाल श्रेष्ठले २०८१-०८२ को नीति तथा कार्यक्रममा बजारीकरणको लागि कार्यक्रम अघि बढाउने घोषणा भए पनि कार्यान्वयन नहुनु राम्रो होइन ।
पाल्पाली ढाकाको विकास, विस्तार र प्रचार प्रसार गर्न तानसेन नगरपालिका र मातहतका कार्यालयहरुमा कार्यरत जनप्रतिनिधि, कर्मचारीहरुका लागि प्रत्येक शुक्रबार पाल्पाली ढाकाबाट निर्मित पोसाक र ढाकाटोपी लगाउने नीति लिइए पनि कार्यान्वयन भएन । नगरपालिका र मातहतका कार्यालयमा प्रयोग गरिने रूमाल, पर्दाहरु ढाकाको राख्न अनिवार्य गरी स्थानीय ढाकाको प्रवद्र्धन गर्न व्यवस्था मिलाइने भनिए पनि नीतिमै सीमित हुनु स्थानीय सरकारको कच्चा काम हो । नीतिअनुसार कार्यक्रम र बजेट व्यवस्थापन हुनुपर्छ । नीति घोषणा हुने, तर कार्यक्रम कार्यान्वयन नहुने प्रवृत्तिले निर्वाचित जनप्रतिनिधिप्रति जनताको विश्वास र भरोसा टुट्छ ।
तानसेन नगरपालिकाले घोषणा भएको नीतिलाई कार्यान्वयन गर्न पहलकदमी लिनुपर्छ । ढाका पाल्पाको पहिचान भएकाले पनि ढाको प्रवद्र्धन गर्दा पाल्पाको पर्यटन प्रवद्र्धनमा पनि टेवा पुग्छ ।
