बुटवल । लुम्बिनी प्रदेशमा जारी प्रधानमन्त्री कप (पीएम कप) पुरुष राष्ट्रिय क्रिकेट प्रतियोगितामा बिहीबार नेपाल पुलिस क्लब र कर्णाली प्रदेश टिमले आआफ्ना खेल जितेका छन् । एक्सट्राटेक ओभल मैदानमा पुलिसले लगातार सातौँ जित हात पार्ने क्रममा बागमती प्रदेशलाई ९३ रनले हराएको हो ।
यो जितसँगै पुलिसको फाइनल सम्भावना उच्च भएको छ । पहिला ब्याटिङ गरेको पुलिसले ओपनर कुशल भुर्तेललको ८८ रनको मद्दतमा जारी संस्करणको उच्च स्कोर ८ विकेटमा २९७ रन बनाएको थियो । जवाफमा बागमती ४५.२ ओभरमा २०४ रन बनाउँदा अलआउट भयो । ६ मध्ये ४ खेलमा पराजित भएको बागमतीको फाइनल सम्भावना समाप्त भएको छ । पुलिसको जितमा भुर्तेलले अलराउन्ड प्रदर्शन गरे ।
ब्याटिङबाट ८८ रन बनाएका उनले बलिङमा पनि ३ विकेट लिए । यस्तै ललित राजवंशीले ४ विकेट लिए भने करण केसीको नाममा दुई विकेट रह्यो । कप्तान दीपेन्द्रसिंह ऐरीले ४६ बलमा ६० रन प्रहार गरेपछि पुलिसले विशाल योगफल तयार पारेको थियो । जवाफमा बागमतीका ओपनर इशान पाण्डेले ७० रन बनाए पनि उनलाई अरु ब्याटरले साथ नदिँदा टिमले जित हात पार्न सकेन् । बागमतीका लागि शुभ कंसाकारले ३६ रनको योगदान दिएका थिए ।
यस्तै सिद्धार्थनगरमा बिहीबारै भएको खेलमा कर्णाली प्रदेशले लुम्बिनी प्रदेशमाथि पाँच रनको रोमाञ्चक जित हात पारेको छ । पहिला ब्याटिङ गरेको कर्णालीले ४८.५ ओभरमा सबै विकेट गुमाउँदा २०५ रन बनाएको थियो । जवाफमा लुम्बिनी ४९.४ ओभरमा २०० रन बनाउँदा अलआउट भयो । कर्णालीका लागि दीपेन्द्र राउतले ६६ तथा अर्जुन घर्तीले ५६ रन बनाएपछि उसको फाइटिङ स्कोर बनेको थियो ।
लम्बिनीका लागि रमेश कुर्मीले तीन विकेट लिएका थिए भने निर्मल गुरुङ, अजय चौहान र विप्रसन केसीले दुई दुई विकेट लिएका थिए । सामान्य लक्ष्य पछ्याए पनि जित हात पार्न नसकेको लुम्बिनीका लागि प्र्रज्वल थापाले ८४ र कप्तान देव खनालले ४० रन बनाए पनि टिमलाई जित दिलाउन सकेनन् । जितपछि कर्णालीले फाइनल पुग्ने सम्भावना कायमै राखेको छ भने हारपछि लुम्बिनीले अंकतालिकामा आर्मीसँग बराबरी गर्ने अवसर गुमाएको छ ।
प्रतियोगिता अब केही खेलहरू मात्र बाँकी रहँदा सात खेलमा सबै जितका साथ १४ अंक रहेको पुलिस शीर्ष स्थानामा छ भने ६ मध्ये पाँच खेलमा जित हात पारेको आर्मी १० अंकका साथ दोस्रो स्थानमा छ । यस्तै सातमध्ये ४ खेल जितेको लुम्बिनी तेस्रो, पाँचमध्ये तीन खेल जितेको एपीएफसी चौथो, ६ मध्ये तीन खेल जितेको कर्णाली पाँचौ, पाँचमध्ये दुई खेल जितेको मधेश छैटौँ स्थानमा रहँदा त्यसपछि सुदूरपश्चिम, बागमती, कोशी र गण्डकी प्रदेश रहेको छ । हरेक टिमले नौ नौ खेल खेल्नेछन् । शीर्ष दुई टिमबीच फाइनल हुनेछ ।
