तराईको उखरमाउलो गर्मी छल्न अर्घाखाँचीको नरपानीमा पुग्नेको घुँइचो छ । सुपादेउराली मन्दिरमा पूजाआजा गरी नरपानीको चिसोमा रमाउनेको घुँइचोले यहाँको पर्यटन प्रवद्र्धनमा बल पुगेको छ । तराईमा गर्मी हुँदा यहाँ चिसो हुने र जाडोयाममा शितलहर चल्दा पारिलो घाम लाग्ने मात्रै नभइ यहाँबाट सुन्दर हिमश्रृखंला देख्न पाउँदा यहाँ आउनेहरु रमाइलो महशुस गर्दछन् । पछिल्ला केही वर्षयता भारतीय पर्यटकको आगमनले नरपानी आकर्षक पर्यटकीय गन्तव्य भएको छ ।
यो एउटा उदाहरण हो । नरपानीमा झैँ यहाँका धेरै पहाडी डाँडामा आन्तरिक र बाह्य पर्यटक आकर्षित गर्न सकिन्छ । पाल्पाको श्रीनगर, नुवाकोट, बसन्तपुर, दाङको घोरबन्दालगायत डाँडालाई ‘हिलस्टेशन’को रुपमा विश्रामस्थल बनाउन सकिन्छ । त्यसका लागि राजनैतिक नेतृत्वको इच्छाशक्ति, योजना र कार्यक्रम आवश्यक पर्छ । प्राकृतिक दृष्टिले वैभवयुक्त यी स्थलमा पूर्वाधार निर्माणलाई प्राथमिकता दिन ढिलाइ भइरहेको छ । पर्यटकका लागि पहिलो प्राथमिकता हो, सडक पूर्वाधार । सडक यातायात सहज र भरपर्दो हुने बित्तिकै सीमावर्ती भारतीय क्षेत्रका बासिन्दा हाम्रा हिल स्टेशनमा विश्राम गर्न आउनेहरु ह्वात्तै बढ्न सक्छन् ।
हिल स्टेशनमा पर्यटकीय पूर्वाधार बन्न ढिलाइ भइरहेको छ । नुवाकोट र श्रीनगरमा लुम्बिनी प्रदेश सरकारले सांस्कृतिक डबली निर्माण गरेको भए पनि ती डबली सञ्चालन गर्न ध्यान दिइएको छैन । ती डबली निर्माण गर्नुको उद्देश्य हो, हिल स्टेशनमा आन्तरिक र बाह्य पर्यटक आकर्षित गर्नु । तर ती डबली सञ्चालन नहुँदा माल पाएर चाल नपाएजस्तो भएको छ । पाल्पाको बसन्तपुर र नुवाकोटमा निजी क्षेत्रको लगानीमा केबुलकार सञ्चालनमा आएको छ । बसन्तपुरमा कामाख्यादेवीको मन्दिर बनाएर सांस्कृतिक पर्यटक आकर्षित गर्ने योजना बनाइएको छ । नुवाकोटमा पहिलेदेखि रहेको भैरव मन्दिरलाई नयाँ बनाएर सांस्कृतिक पर्यटन प्रवद्र्धन गर्ने योजना अघि सारिएको छ । प्राकृतिक वैभव एकातिर छँदैछ, अर्कोतिर सांस्कृतिक स्थलको विकासले पनि आन्तरिक र बाह्य पर्यटक आकर्षित गर्न सकिन्छ ।
नेपालमा पर्यटनको प्रचुर संभावना छ, तर त्यो संभावनाको पहिचान गरी योजना र कार्यक्रम बनाउने, ती योजना कार्यान्वयनका लागि बजेट विनियोजन गर्ने भिजनरी नेतृत्वको खाँचो छ । पर्यटनबाट मुलुकको समृद्धि संभव छ, तर बजेट कनिका छरेझैँ छर्ने तर पूर्वाधार निर्माणमा बजेट खर्च नगर्ने प्रवृत्तिलाई निरुत्साहित गर्दै अघि बढ्नुको विकल्प छैन । अहिले बजेट बनाउने बेला छ, लुम्बिनी प्रदेशका संस्थापक मुख्यमन्त्री शंकर पोखरेलका पालामा अघि बढाइएका पर्यटन प्रवद्र्धनका दुरगामी महत्वका योजनामा बजेट विनियोजन गर्दा विकासको नतिजा पाउन सकिन्छ । प्रतिफल र नतिजामुखी आयोजनामा बजेट खर्च गर्न ध्यान दिनुपर्छ ।
