लुम्बिनी संवाददाता
बुटवल
चर्च ब्वाइज युनाइटेड क्लब ललितपुरले २३औं तिलोत्तमा गोल्डकप फुटबल प्रतियोगिताको उपाधि जितेको छ ।
देवीनगरस्थित एन्फा टेक्निकल सेन्टरको मैदानमा शनिबार सम्पन्न फाइनलमा विभागीय टिम सशस्त्र प्रहरीको एपीएफ क्लबलाई २–० गोल अन्तरले पराजित गर्दै चर्च ब्वायजले उपाधि जितेको हो ।
चर्च ब्वायजको जितमा पहिलो हाफमा खेलको १९औं मिनेटमा विदेशी खेलाडी रिचार्ड विल्सनले र खेलको ६६औं मिनेटमा राज भुसालले एक– एक गोल गरे । विल्सनले राजको कर्नरमा आएको बललाई हेडिङमार्फत् जाली चुमाएका हुन् । ६५औं मिनेटमा अमन लामाले पेनाल्टी बक्स नजिकबाट प्रहार गरेको फ्रिकिकलाई एपिएफका गोलकिपर विशाल गुरुङले बचाएका थिए । तर, रिबाउन्डमा राजले गोल गरेका हुन् । फाइनलको म्यान अफ द म्याच भुसाल नै भए ।
एपीएफले भने पटक–पटक प्राप्त गरेको अवसरलाई चर्च ब्वाइजका गोलकिपर विवश चौधरीले उत्कृष्ट बचाउ गरे ।
जिल्ला फुटबल संघ रुपन्देहीले आयोजना गरेको प्रतियोगितामा दुई विभागीय र भारतका दुई सहित ८ टिमले भाग लिएका थिए ।
प्रतियोगिताको उपाधि विजेता चर्च ब्वायजले १२ लाख १२ हजार २ सय २२ रुपैयाँ र उपविजेता एपीएफले ६ लाख ६६ हजार ६ सय ६६ रुपैयाँ नगद पुरस्कार प्राप्त गरेको एन्फा रुपन्देहीका महासचिव हिमाल गौचनले जानकारी दिए ।
प्रतियोगिता सञ्चालन गर्न बुटवल उपमहानगरले ४० लाख बजेट छुट्याएको थियो भने यशोदा फुड्सले करिब २५ लाख रुपैयाँ नगद पुरस्कार प्रायोजन गरेको थियो ।
प्रतियोगितामा वेस्ट गोलकिपर चर्च ब्वाइजका विवश चौधरी भए । वेस्ट मिड फिल्डरको उपाधि एपीएफका स्यामुयल सुनारले पाए भने वेस्ट फरवार्ड चर्च ब्वाईजका रिचार्ड विल्सन भए ।
यस्तै, वेस्ट डिफेन्डर एपीएफका मानबहादुर राना तथा वेस्ट कोच चर्च ब्याइजका आशिक थापा मगर भए । विधागत उत्कृष्ट खेलाडी र कोचले नगद ३१ हजारका दरले पुरस्कार पाए ।
प्रतियोगिताको उत्कृष्ट खेलाडी चर्च ब्वाइजका अमन लामा घोषित हुँदै स्कुटर प्राप्त गरे । विजयी टिम र खेलाडीलाई आयोजक संस्थाका अध्यक्ष लोक पुन, प्रतियोगिताको संरक्षक बुटवल उप–महानगरका प्रमुख खेलराज पाण्डेय, नगद पुरस्कारको प्रायोजक यशोदा फुड्स र त्रिमूर्ति इण्डस्ट्रिजका नरिश्वर पौडेललगायतले पुरस्कार तथा प्रमाणपत्र विरण गरेका थिए ।
