नेपाली खेल जगतको पूरानो र प्रतिष्ठित तिलोत्तमा गोल्डकप फुटबल प्रतियोगिताको २३औं संस्करणमा उत्साह देखिन सकेन् । चैत ९ गतेदेखि १६ गतेसम्म भएको प्रतियोगितामा प्रतिष्ठित राष्ट्रिय टिम आउन रूची देखाएनन्, दर्शकको रोजाइमा पनि पर्न नसक्दा प्रतियोगिताको औचित्यमै प्रश्न उठेको छ ।
खेलकुदले समाजमा आशा र उत्साह जगाउँछ । खेलाडी र दर्शकलाई अनुशासन र मर्यादामा बस्न सिकाउँछ । पछिल्ला वर्ष खेल पर्यटनको संभावना बढ्दै गएकाले तिलोत्तमा गोल्डकपमार्फत् बुटवलमा खेल पर्यटन प्रवद्र्धन गर्न सकिने संभावनालाई पटक्कै चासो देखाइएन् । तिलोत्तमा गोल्डकप बुटवलको प्रतिष्ठा हो, बुटवलको गौरव हो । बुटवलसँग जोडिएको यो प्रतियोगितालाई उप–महानगरपालिकाले बिगतदेखि नै अपनत्व लिएर सफल पार्न सहयोग गर्दै आएको भए पनि आयोजक रूपन्देही फुटबल संघले प्रतियोगितालाई भव्य पार्न यसपाली चुकेको छ । प्रतियोगिता सञ्चालन गर्ने जिम्मेवारी विगतदेखि नै रूपन्देही जिल्ला फुटबल संघले लिएकोले यो प्रतियोगिताको व्यवस्थापन गर्न फुटबल संघ किन चुक्यो ? उप–महानगरपालिकासहित विभिन्न व्यापारिक र औद्योगिक प्रतिष्ठान प्रतियोगिताको लागत व्यवस्थापनमा सहभागी भएकाले आर्थिक समस्या पनि थिएन । गोल्डकपका लागि उप–महानगरपालिकाले ४० लाख रुपैयाँ बजेट विनियोजन गरेको छ ।
अरु व्यापारिक प्रतिष्ठानले दिएको पैसा पनि पारदर्शी हुनुपर्छ । आम्दानी र खर्च सार्वजनिक गरेर आयोजनकले आफूलाई पारदर्शी बनाउनुपर्छ । पैसाको व्यवस्थापन एउटा पाटो हो, अर्को पाटो प्रतियोगितामा कस्ता टिम सहभागी हुन्छन् र दर्शकको उत्साह कत्तिको हुन्छ भन्ने महत्वपूर्ण हुन्छ ।
तिलोत्तमा गोल्डकपको इतिहास स्वर्णीम छ, यही प्रतियोगिताबाट नै यहाँबाट धेरै आशालाग्दा खेलाडी उत्पादन भए । प्रतियोगिताको गौरवमय विगत जतिबेलासम्म जोगिनसक्छ, वर्तमानमा पनि यो प्रतियोगितालाई भव्य बनाउन अहोरात्र खटेर नतिजा निकाल्न सकिन्छ । फितलो प्रतियोगिता आयोजना गरेको र आयोजकले गौरवमय विगतलाई धुतीसाल बनाएको छ । अब कमजोरी समीक्षा गरी प्रतियोगितालाई भव्य बनाउने गरी योजना बनाउनुपर्छ ।
बुटवलको पहिचान र प्रतिष्ठा जोडिएको प्रतियोगितालाई भव्य बनाउन उप–महानगरपालिकाले पनि मिहिन ढंगले चासो दिनुपर्छ । बजेट विनियोजन गरेर प्रतियोगितालाई सफल बनाउन सहयोग गरेको उपमहानगरपालिकाले अब बजेट मात्रै होइन्, बदलिदो परिवेशलाई ख्याल गरेर प्रतियोगिता भव्य बनाउन आयोजकले ध्यान दिएका छन् कि छैनन् भनेर निगरानी गर्न सक्छ । उपमहानगरपालिकाको खेलकुद विकास समिति क्रियाशिल रहेकोले त्यही समितिले अनुगमन र मार्गनिर्देशन गर्न सक्छ ।
