बुटवल । रुपन्देहीको सबैको बचत तथा ऋण सहकारी संस्था लुम्बिनी प्रदेशको उत्कृष्ट सहकारी पुरस्कारबाट पुरस्कृत भएको छ । प्रदेश सरकारको कृषि, भूमि ब्यवस्था तथा सहकारी मन्त्रालयले प्रदेशस्तरीय कार्यक्षेत्र भएका ८ सय ४८ सहकारी मध्ये कार्य सम्पादन मूल्याङकनमा सबैको वचत तथा ऋण सहकारी संस्थालाई पुरस्कृत गरेको हो । मन्त्रालयले पल्र्स, सदस्य केन्द्रियता र सुशासनका क्षेत्रमा विभिन्न सूचक निर्धारण गरी संस्थाहरुको सघन मुल्यांकन गरेको थियो । ६८ औं सहकारी दिवसका अवसरमा दाङमा भएको कार्यक्रममा मुख्यमन्त्री चेतनारायण आचार्य र कृषि, भूमि ब्यवस्था तथा सहकारी मन्त्री दिनेश पन्थीले सहकारीका अध्यक्ष भरतराज भुसाललाई नगद सात हजार पुरस्कार तथा प्रमाणपत्र प्रदान गरे ।
चार वर्षअघि ११ वटा सहकारी एकीकरण भएर बनेको सबैको सहकारीमा ८ हजार सदस्य छन् । एक अर्ब २८ करोड कूल पूंजि र १० करोड ५० लाख शेयर पुंजी रहेको सहकारीको तिलोत्तमा–५ मा केन्द्रीय कार्यालय सहित ११ वटा सेवा केन्द्र छन् । सहकारीलाई पुरस्कार वितरण गर्दै मुख्यमन्त्री आचार्यले सहकारी संस्थाहरु समाजवादी अर्थतन्त्रको मेरुदण्ड भएको बताए ।
सहकारीको विकास र नियमनमा सरकार योजनाबद्ध रुपमा लागेको बताउंदै उनले अन्य प्रदेशबाट प्रवेश गरेका केही सहकारीले समग्र सहकारीको बदनाम गरेको उल्लेख गरे । कृषि, भुमि ब्यवस्था तथा सहकारी मन्त्री दिनेश पन्थीले सहकारीलाई सही मार्गमा हिंडाउन सरकारले नियमित नियमन गरी कार्यसम्पादन मुल्यांकनका आधारमा असल सहकारी र कमसल सहकारीको वर्गिकरण गर्ने बताए ।
नेफ्स्कुनका बरिष्ठ उपाध्यक्ष दामोदर अधिकारीले मोफसलका सहकारीहरु खासै संकटमा नपरेको बरु काठमाडौंबाट आयातित र शक्ति केन्द्रबाट निर्देशित दर्ताकै बहु जिल्ला र बहु प्रदेश कार्यक्षेत्र दिइएका सहकारीहरुमा समस्या भएको औंल्याए ।
पुरस्कृत सहकारीका अध्यक्ष भरतराज भूसालले सहकारीहरुको कार्यसम्पादन मुल्याङ्कन र सहकारीहरुको बर्गिकरणले राम्रो गर्नेलाई हौसला र कमजोर कार्यसम्पादन भएकालाई सुध्रिने अवसर प्राप्त हुने हुँदा कार्यसम्पादन मुल्याङ्कनलाई निरन्तर र थप प्रभावकारी बनाउन आग्रह गरे । सहकारी संस्थाहरुले अनिवार्य रुपमा तिर्दै आएको सहकारी प्रवद्र्धन कोषको रकम सहकारी नियमन र कार्य सम्पादन मूल्याङकनमा खर्च गर्न पनि उनले आगह गरे ।
