तिलोत्तमा । तिलोत्तमामा जारी १० औं मणिमुकुन्द कप भलिबल च्याम्पियनसिपमा सेमिफाइनल पुग्ने चार टिमको टुंगो लागेको छ । बिहीबार राति सम्पन्न समूह चरणको अन्तिम खेलमा गल्कोट भलिबल क्लबले विभागीय टिम नेपाल पुलिस क्लबलाई ३–० को सोझो सेटमा पराजित गरेसंगै सेमिफाइनल पुग्ने चार टिमको टुंगो लागेको हो ।
भारत गुजरातको साग भलिवल एकेडेमी समूह ए बाट विजेता र त्रिभुवन आर्मी क्लब उपविजेता बन्दै प्रतियोगिताको अन्तिम ४ टिममा स्थान पक्का गरेका हुन् भने
समूह बीबाट गल्कोट भलिबल क्लब विजेता र गण्डकी प्रदेश भलिबल क्लब उपविजेता बन्दै सेमिफाइनल प्रवेश गरेका हुन् ।
आज शुक्रवार सेमिफाइनलमा गुजरात र गण्डकी तथा गल्कोट र आर्मी भिड्ने छन् । प्रतियोगिताबाट आयोजक मणिमुकुन्द भलिबल क्लब, विभागीइ टिम एपीएफ, पुलिस र कोशी प्रदेश भलिबल संघ बाहिरिएका छन् ।
तिलोत्तमा २ स्थित क्लबको आफ्नै खेल मैदानमा यस क्षेत्रमै पहिलोपटक आयोजना भएको रात्रिकालीन भलिबल प्रतियोगिताको फाइनल भोलि शनिबार हुने प्रतियोगिता संयोजक सुरेन्द्र गुरुङले बताए ।
प्रतियोगितामा प्रथम हुनेले नगद रू ३ लाख ११ हजार एक सय ११ , दोस्रो हुने टिमले नगद २ लाख ११ हजार एक सय ११ रुपैयां , तेस्रो हुनेले १ लाख ११ हजार एक सय ११ रुपैयां तथा सान्त्वना हुने टिमले ६६ हजार ६ सय ६६ रुपैयां तथा कप र प्रमाणपत्र हात पार्ने आयोजक क्लबका अध्यक्ष लोकेन्द्र भण्डारीले बताए ।
उत्कृष्ट खेलाडीले १५ हजार, बिधागत तर्फ ६ जना खेलाडीहरूलाई नगद रू १० हजारका दरले नगद र मेडल, प्रमाणपत्रले पुरस्कृत गरिने छ । प्रतियोगितामा इरान र भारतका खेलाडीको सहभागिताले खेल रोमाञ्चक भइरहेको क्लबका निर्वमान अध्यक्ष मिलन रानाले बताए । खेल भइरहेकै बेला बीच बीचमा गीत संगीत बज्ने र दर्शकहरु प्यारापिटमै नाच्ने गर्दा खेल मैदान संगीतमय समेत बनेको छ ।
