बुटवल । बुटवलको लुम्बिनी केबलकार लि.ले जन्म दिनमा केवलकार यात्रा गर्न चाहनेलाई दुईतर्फी टिकट निःशुल्क दिने भएको छ । 
  केबलकारको यात्रा प्रवद्र्धनका लागि विभिन्न अफर र योजना ल्याउंदै आएको कम्पनीले यही बैशाख १५ गतेदेखि लागू हुने गरी नयां अफर ल्याएको हो । 
जन्मदिनको अवसरमा केबलकार मार्फत टप स्टेशनमा रहेको कामाख्या देवी मन्दिर दर्शन र आशिर्वाद ग्रहणका लागि सर्वसाधारणलाई सहज होस् भनेर यो अफर ल्याइएको कम्पनीका म्यानेजर प्रज्ज्वल घिमिरेले बताए । ‘आम सर्वसाधारण नागरिकले आफ्नो जन्म दिन नयां पर्यटकीइ गन्तव्य एवं प्रख्यात शक्तिपीठमा माता कामाख्याको आशिर्वाद लिंदै खुशी साथ मनाउन पाउन् भनेर यो अफर ल्याएका हौं’–केबलकारका म्यानेजर घिमिरेले भने । 
जन्मोत्सव मनाउन केबलकार जाने यात्रुहरुले जन्म मिति खुल्ने आधिकारिक सरकारी कागजात अनिवार्यरुपमा देखाउनुपर्ने कम्पनीले जनाएको छ ।
जन्म दिन परेका व्यक्ति कामाख्या मन्दिर पुगिसकेपछि वैदिक बिधिपूर्वक अष्टचिरञ्जिवी पूजा गरिदिने व्यवस्था समेत गरिएको कामाख्या धामका मूल पुजारी सुरेश पौडेलले बताए । अष्टचिरञ्जिवी पूजा गर्नाले शरीर निरोगी एवं दीर्घायू हुने धार्मिक विश्वास रहेको छ । 
परिवार एवं साथीहरुसंग जन्मोत्सव मनाउन बसन्तपुर पुग्नेहरुका लागि आवश्यक सुविधाहरु त्यहां सञ्चालित रेष्टुरेन्टमा उपलब्ध रहेको कम्पनीले जनाएको छ । यो अफरले आफ्नो जन्मदिनमा निःशुल्क केबलकार यात्रा तथा  प्रख्यात शक्तिपीठ कामाख्या मन्दिरमा दर्शन र अष्टचिरञ्जिवी पूजाको सुविधा लिने सर्वसाधारण, तथा पर्यटकको आगमन बृद्धि हुने कम्पनीले विश्वास लिएको छ । अष्ट्रियाको विश्वविख्यात डुपलमायर कम्पनीको अत्याधुनिक प्रविधिबाट सञ्चालित लुम्बिनी केबलकार प्रदेशको पहिलो केबलकार हो । केबलकारको माथिल्लो स्टेशन बसन्तपुर समुन्द्री सतहबाट करिब एक हजार मिटर उचाईमा छ । त्यहां तराईको भन्दा ८ देखि १० डिग्री सेल्सियससम्म तापक्रम कम हुने भएकाले गर्मी मौसममा शीतल र चीसो हुनुका साथै धुंवाधुलोको प्रदुषणमुक्त स्वच्छ वातावरणमा रमाउन सकिने केबलकारका अपरेसन म्यानेजर डिएन कायस्थ सैंजूले बताए । बसन्तपुरमा स्तरीय रेष्टुरेन्ट, जीपलाइन, स्काई साइक्लिङ, आधुनिक पिङ, बाल उद्यान लगायत पर्यटकहरु रमाउने र भुल्ने पुर्वाधारहरु बनेका छन् ।