नेपालगन्ज । बाँकेको डुडुवा नदीमा आएको बाढीमा डुबेर बेपत्ता भएका नेपालगन्ज २० का एक पुरुषको खोजी कार्यलाई तीव्र पारिएको सशस्त्र प्रहरी बल ३० नम्बर गण हेडक्वाटर बाँकेले जनाएको छ ।
आइतवार साँझ करिब ५ बजे नेपालगन्ज –२० राँझा विमानस्थल पछाडि रहेको डुडुवा नदीमा पौडी खेल्ने क्रममा सोही ठाउँका ४२ वर्षीय सुशीलप्रसाद दाहाल डुबेर बेपत्ता छन ।
दाहालको खोजी कार्य भइरहेको प्रहरीले जनाएको छ । सोमवार बिहानदेखि खोजी कार्यलाई तीव्र पारिएको सशस्त्र प्रहरी बल ३० नम्बर गण हेडक्वाटर बाँकेका गणपति एसपी विमल डाँगीले बताए ।
उनले दाहाल डुडुवामा डुबेर बेपत्ता भएको खबर प्राप्त हुनेबित्तिकै सशस्त्र प्रहरी बल, नेपाल आयल निगम सुरक्षा बेस राँझाबाट सशस्त्र प्रहरी निरीक्षक नवराज शाहीको कमाण्डमा ७ जनाको टोली खटिई नेपाल प्रहरी र स्थानीय बासिन्दाको सहयोगमा खोजीकार्य गरिरहेको बताए ।
