बुटवल
लुम्बिनी प्रदेश सरकारले आफू मातहतका सबै अस्पताल विकास समितिहरू विघटन गरेको छ ।
बैशाख १६ गते बसेको प्रदेश मन्त्रिपरिषद् बैठक, (आर्थिक, सामाजिक तथा पूर्वाधार समितिको बैठक) ले प्रदेशका १२ वटै अस्पतालहरूका विकास समिति विघटन गर्ने निर्णय गरेको हो ।
लुम्बिनीमा दाङको तुलसीपुरस्थित राप्ती प्रादेशिक अस्पताल र बुटवलमा लुम्बिनी प्रादेशिक अस्पताल गरी दुई प्रादेशिक अस्पतालहरू छन् । अन्य जिल्ला अस्पतालहरू छन् । लुम्बनी प्रदेश भरका कुल १४ अस्पतालहरूको विकास समितिहरू एकै साथ विघटन गरिएको हो ।
ती सबै अस्पतालहरूका विकास समितिहरू विघटन गर्ने निर्णय भएको स्वास्थ्य मन्त्रालयका सचिव दुर्गा लक्ष्मी श्रेष्ठले आइतबार जारी गरेको वक्तव्यमा उल्लेख छ ।
स्रोतका अनुसार प्रदेशभरका अस्पतालहरूमा विकास समिति विघटन गर्ने निर्णय गत चैत २६ गते नै प्रमुख सत्तासाझेदार दलहरू नेपाली कांग्रेस र नेकपा एमालेका बिचमा भइसकेको थियो । तर, त्यो कार्यान्वयनमा लैजान केही ढिलाइ भएको हो ।
नेकपा (माओवादी केन्द्र) र नेकपा (एमाले) का बिचमा सत्ता समीकरण छँदा लुम्बिनीमा अस्पताल विकास समितिहरू गठन गरिएका थिए ।पछिल्लो समय राजनीतिक समीकरण फेरिएर नेकपा (एमाले) र नेपाली कांग्रेसबिचमा सत्ता समीकरण रहेको हुँदा आफू अनुकूलका मानिसहरू विकास समितिमा मनोनित गर्न विकास समितिहरू विघटन गरिएको स्रोतले बतायो ।
यी दुई दलकाबिचमा कुन अस्पतालमा कसलाई अध्यक्ष बनाउने भन्ने बारेमा लगभग सहमति भइसकेको हुँदा छिट्टै नयाँ विकास समिति गठन गरिने स्रोतले बताएको छ ।
