बुटवल । लुम्बिनी प्रादेशिक अस्पताल बुटवलमा गत बैशाख ६ गते प्रसुति गराउने क्रममा मृत अवस्थामा जन्मेको नवजात शिशुको शब १८ दिनपछि उठेको छ । पश्चिम नवलपरासीको सुनवल नगरपालिका ४ की सुस्मा खरेल प्रसुति गराउन बैशाख ५ गते राति प्रादेशिक अस्पताल भर्ना भएकी थिइन् । सुस्माको शनिबार राति १२ बजेतिर मात्रै शल्यक्रिया गरेर बच्चा निकालिएको थियो । तर जन्मने वित्तिकै बच्चाको मृत्यु भएको थियो । सुस्माले १४ वर्षपछि छोरा जन्माएकी थिइन् । तर अस्पतालले बचाउन नसकेपछि सुस्माका श्रीमान् रामप्रसाद खरेल, सुस्माका बुबा ग्यामलाल भुसाल लगायत आफन्तले उपचारमा अस्पतालको लापरवाही भएकाले बच्चाको ज्यान गएको आरोप लगाउंदै शब बुझ्न अस्वीकार गरेका थिए । अस्पताल भर्ना गर्नु अघि डा. भक्तबहादुर राउतले चेकजांच गर्दै आएका सुस्माको गर्भमा रहेको बच्चाको स्वास्थ्य अवस्था चैत ३१ गतेसम्म एकदमै राम्रो रहेको सुस्माका श्रीमान रामप्रसादले बताए ।
‘अस्पताल भर्ना गरेपछि नर्सिङ स्टाफ र डाक्टरले संवेदनशील भई राम्रोसंग चेकजांच र उपचार गरेको भए बच्चा जिवितै जन्मिन्थ्यो भन्ने हाम्रो ठहर हो’– सुस्माका बुबा ग्यामलालले भने–‘बच्चाको ज्यान त गयो नै झण्डै सुस्माको पनि ज्यान जाने अवस्था थियो, म आफै रोइकराई र हारगुहार गरेर बचाइदेऊ भनेपछि बल्ल अलि राम्रोसंग उपचार भयो र उनी बाचिंन् ।’
रामप्रसाद र भुसालले बुधबार अस्पतालका मेसु डा. इन्द्र ढकालसंग भेट गरी अस्पतालका डाक्टर र नर्सहरुलाई विरामीको उपचारमा संवेदनशील र जिम्मेवार बनाउन सचेत गराउंदै भविष्यमा यस्ता लापरवाहीका घटना दोहोरिन नदिन आग्रह गरे । अस्पतालका मेसु ढकालले भने प्रसुति हुन आउने सबै महिलाको शुरुमै अप्रेसन गरेर बच्चा ननिकालिने बताए । उनले डाक्टर र नर्सहरुलाई उपचारमा थप जिम्मेवार बनाउन आफूले निर्देशन दिने आश्वासन दिए । ढकालले अस्पतालमा वार्षिक सरदर १३ हजार बच्चा जन्मिने र ती मध्ये ७–८ जना बच्चा र सोही संख्यामा आमाहरुको मृत्यु हुने गरेको बताए ।
