मुलुक आर्थिक संकट चुलिएपछि सरकारले चालेका कदमले मुलुकमा सकारात्मक नतिजा आइरहेका छन् । ती नतिजाले  आशा जगाउने काम गरेका छन् ।  अहिले सुधारको लागि चालेका कदम सही दिशातिर अघि बढेका छन्, त्यसलाई सकारात्मक मान्नुपर्छ ।

गत आर्थिक वर्षको ९ महिनाको तुलनामा चालु आर्थिक वर्षको सोही अवधिमा राजस्व केही वृद्धि भएको छ । चालु आर्थिक वर्षको पछिल्लो ९ महिनामा ६४ प्रतिशत राजस्व संकलन भएको छ । यो गत आर्थिक वर्षको सोही अवधिको तुलनामा ९ प्रतिशतको वृद्धि हो । विदेशी मुद्राको सञ्चिति पछिल्लो एक वर्षदेखि निरन्तर बढ्दो छ । चालु आर्थिक वर्षको ९ महिनाको अवधिमा नेपालको विदेशी मुद्रा सञ्चितिमा अमेरिकी डलर अत्यधिक बढेको छ । नेपाल राष्ट्र बैंकले सार्वजनिक गरेको तथ्याङ्कअनुसार, चालु आर्थिक वर्षको ९ महिनामा विदेशी मुद्रा सञ्चिति २४ खर्ब २६ अर्ब ८४ करोड रुपैयाँ पुगेको छ । २०८१ असार मसान्तमा २० खर्ब ४१ अर्ब १० करोड बराबर रहेको विदेशी विनिमय सञ्चिति १८ प्रतिशतले वृद्धि भई चैत मसान्तमा २४ खर्ब २६ अर्ब ८४ करोड बराबर पुगेको छ । अहिले नेपालमा रहेको विदेशी मुद्राले साढे १७ महिनालाई पुग्ने वस्तु तथा सेवा आयात धान्ने अवस्था छ । नेपाल राष्ट्र बैंकका अनुसार चालु आर्थिक वर्षको ९ महिनामा चालु खाता २१० अर्ब २२ करोडले बचतमा छ ।

अघिल्लो वर्षको सोही अवधिमा चालु खाता १७९ अर्ब ८३ करोडले बचतमा थियो । अमेरिकी डलरमा अघिल्लो वर्षको सोही अवधिमा १ अर्ब ३५ करोडले बचतमा रहेको चालु खाता समीक्षा अवधिमा १ अर्ब ५५ करोडले बचतमा छ । अहिले बैंकहरूमा तरलता वृद्धि भएको, व्याजदर घटेको र लगानी वृद्धि हुन थालेको छ । बैंकिङ प्रणालीमा करिब ६ खर्ब बढीको तरलता लगानी योग्य रहे पनि लगानी हुन सकेको छैन ।   राष्ट्र बैंकले सार्वजनिक गरेको तथ्याङ्कअनुसार चालु आर्थिक वर्षको नौ महिनामा कुल आन्तरिक कर्जा २ दशमलव ५ प्रतिशतले बढेको छ । अघिल्लो वर्षको सोही अवधिमा उक्त कर्जा १ दशमलव ८ प्रतिशतले बढेको थियो ।  काम गरेको आयोजनाको भुक्तानी नपाएको भन्दै सडक आन्दोलन गरेका निर्माण व्यवसायीहरू अहिले सरकारले भुक्तानी दिएको भन्दै खुशी भएका छन् । गत आर्थिक वर्ष २८ अर्ब भुक्तानी बाँकी रहेकोमा चालु आबमा अधिकांश भुक्तानी भइसकेको छ ।

मुलुकमा निराशाको खेती छ । केही भएन्, अब केही हुँदैन, मुलुक ओरालो लाग्यो भन्ने भाष्य निर्माण गर्दा समाज झनै निराश भएको छ । समाजलाई आशा जगाउने सरकार, राजनैतिक दल, चेतनशील नागरिक समाज र सञ्चारमाध्यमले हो । अर्थतन्त्रका सूचकमा आएको सुधारले आशा जगाएको छ । अब निराशालाई चिर्दै अघि बढ्नुपर्छ । अर्थतन्त्रमा आएको सुधार केपी ओली नेतृत्वको सरकारले लिएको सही नीतिका कारण हो भन्ने बुझ्नुपर्छ । केही हुँदैछ, आशा गरौँ । मुलुकको समृद्धिका लागि आन्तरिक उत्पादन बढाउनुपर्नेछ, रोजगारी श्रृजना ठूलो संख्यामा गर्नुपर्नेछ । त्यो दिशामा बढ्ने गरी आगामी आबको बजेट आउने प्रतीक्षा गरौँ । मुलुक संकटको खाडलबाट माथि निस्केको छ । अब तीब्र आर्थिक वृद्धिको बाटोमा बढ्ने आधार तय भएको छ । यो मुलुकको समृद्धिको लागि सुखद पक्ष हो ।