देवदह । नेपाल कम्युनिष्ट पार्टी (नेकपा) का महासचिव नेत्रविक्रम चन्द विप्लव सहित पार्टीका नेताहरुले रुपन्देहीको औद्योगिक घराना आवास ग्रुप अन्तर्गतका केही उद्योगको अवलोकन गरेका छन् । विप्लवले केही सय यता नमूना स्वदेशी उद्योगहरुको अवलोकन गर्दै आएका छन् ।
सोही क्रममा विप्लवले बुटवल औद्योगिक क्षेत्रस्थित सन फिटिङ प्रालि, देवदहको भलुहीस्थित हेल्मेट, लेग गार्ड, फर्निचर र गार्मेन्ट उद्योग तथा मणिग्रामस्थित धाराका सामान उत्पादन हुने ज्याकुअर इण्डस्ट्रिज अवलोकन गरेका हुन् । विप्लवलाई उद्योगका सञ्चालकहरु यज्ञश्वर थैव,महेश थैव लगायत उद्योगका उच्च तहका कर्मचारीहरुले उद्योगका उत्पादनबारे जानकारी गराएका थिए । उद्योगहरु अवलोकनपछि महासचिव विप्लवले आवास ग्रुपले झण्डै एक दर्जन उद्योग सञ्चालन गरेर, सयौंलाई रोजगारी दिएर देशलाई योगदान दिएको भन्दै प्रसंशा गरे । उनले थैव दाजुभाइलाई नेकपाले कपिलवस्तुको शिवगढीमा गरिरहेको कृषि कम्यून अवलोकनका लागि आउन निम्ता समेत दिए ।
‘आवास ग्रुपले जस्तै हामी सबैले स्वदेशमै उद्योग गरेर मुलुकलाई आत्मनिर्भर र स्वाधीन बनाउनुपर्छ’–विप्लवले भने–‘यहांहरुले धेरै राम्रो गरिरहनु भएको रहेछ, राज्यले स्वदेशी उद्योगलाई संरक्षण, विकास र प्रवद्र्धनको नीति बनाउनुपर्ने हो तर अहिलेसम्मका नीतिहरु सन्तोषजनक छैनन् ।’ सो अवसरमा उद्योगीहरु यज्ञश्वर र महेश थैवले सरकारले स्वदेशी उद्योगको संरक्षण भन्दा विदेशी सामान आयातलाई प्रश्रय दिइरहेको गुनासो गरेका थिए । उद्योग अवलोकनमा नेकपाका नेताहरु बसन्त श्रेष्ठ,बिरेन्द्र विक,राजु रसाइली लगायत सहभागी थिए ।
