त्रिभुवन विश्वविद्यालयमा चलिरहेको गुण्डाराज निन्दनीय छ । गुण्डाराज नियन्त्रण गरी विश्वविद्यालयमा शैक्षिक वातावरण बनाउन गृहप्रशासनको बेवास्ता झनै खेदजनक छ । राजनैतिक दलका भातृ संगठनका नेता–कार्यकर्ताले चलाएको गुण्डाराजलाई सत्तारूढ दल र सरकारले नै संरक्षण गर्नु मुलुकमा बढ्दो अराजकताको खुला तस्विर हो ।
त्रिभुवन विश्वविद्यालयमा बेलाबखत चल्दै आएको उदण्ड क्रियाकलपा बुधबार पनि देखियो । सत्तारुढ दल कांग्रेसको भातृ संगठन नेविसंघका कार्यकर्ताहरुले उपकुलपतिको कार्यालयमा प्रहरीकै सामुन्ने तोडफोड गरे । तोडफोडमा उत्रनुको कारण हो–विश्वविद्यालयले स्नातक तहको प्रथम वर्षको भर्ना खुलाउनुपर्छ । माघमै भर्ना बन्द गरी परीक्षा फाराम खोलिसकेको विश्वविद्यालयले भर्ना गर्न नसकिने स्पष्ट पारेको छ । भर्ना नखोलेको आक्रोशमा उपकुलपति कार्यालय तोडफोड गरेर विद्यार्थीहरुले विवेकहिन काम गरेका छन् । भनिन्छ–विद्यार्थी श्रृजनाका खानी हुन्, संभावनाका नायक हुन् र परिवर्तनका वहाक हुन् । कुनै समय विद्यार्थीले नै मुलुकको व्यवस्था परिवर्तनको नेतृत्व गरे । राज्यसत्ताविरुद्ध आन्दोलन गर्दा हुने दमनको प्रतिरोध गर्दा बेलाबखत हुने तोडफोडलाई समाजले स्वभाविक आक्रोशको रुपमा लिन्थ्यो । त्यसलाई राज्यसत्ताको उपज ठान्थ्यो । तर अहिले समाज परिवर्तन भएको छ । विद्यार्थीको भूमिका बदलिएको छ । राजनैतिक मुद्दाभन्दा शैक्षिक मुद्दा प्राथमिकतामा पर्नुपर्नेमा विद्यार्थी स्वार्थ समूहको कारिन्दा भएका छन्, उनीहरु शैक्षिक मुद्दालाई उठान गरी रचनात्मक ढंगले समाधान गर्नुको साटो गुण्डाराज चलाएका छन् । विद्यार्थी संगठनहरुले त्रिविलाई क्यालेण्डरअनुसार शैक्षिक कार्यक्रम चलाउन र शैक्षिक गुणस्तर बढाउन रचनात्मक दबाब दिएका छैनन् । उनीहरुले नियोजित रुपमा अस्वभाविक माग राख्ने र तोडफोड गर्ने प्रवृत्तिलाई बढाइरहेका छन् । त्रिवि नेविसंघ, अनेरास्ववियू र अखिल क्रान्तिकारीलगायत विद्यार्थी संगठनहरुको शक्ति प्रदर्शन गर्ने थलो भएको छ । उनीहरुको यो शक्ति प्रदर्शनले विश्वविद्यालय थला पर्दै जानुको विकल्प छैन्, त्यसैगरी उनीहरुको माउ पार्टीप्रति नागरिकको भरोसा र विश्वास पनि पटक्कै बढ्दैन ।
मुलुकमा राजनैतिक परिवर्तन भयो, अब हाम्रो आचरण र व्यवहार परिवर्तन हुनु पनि उत्तिकै आवश्यक छ । गुणगर्दी र अराजक व्यवहार र कार्यशैलीले समाजलाई सही दिशानिर्देश गर्न पटक्कै सक्तैन् । त्रिविमा भइरहेको गुण्डागर्दी क्रियाकलापले पदाधिकारी त्रसित भइरहने प्रवृत्तिले उनीहरुले कसरी विश्वविद्यालयलाई सबल बनाउन सक्छन् ? आतंकको छायाँमा कसरी कक्षा कोठामा पठनपाठन राम्रो हुन्छ ? त्रिविमा भइरहेको यो गुण्डाराजका बारेमा प्रधानमन्त्रीदेखि प्रमुख दलका शीर्ष नेता जानकार छन् । गत वर्ष तत्कालीन शिक्षामन्त्री विद्या भट्टराईले सामाजिक सञ्जाल फेसबुकमा स्टाटस लेखेर गृहमन्त्री रमेश लेखकसँग त्रिभुवन विश्वविद्यालयका पदाधिकारी लगायतको सुरक्षाको माग गरेकी थिइन् । विभागिय मन्त्रीले सामाजिक सञ्जालबाट त्रिविका पदाधिकारीको सुरक्षा गृहमन्त्रीसँग माग्नु अर्थपूर्ण छ ।
सधैँ गुण्डागर्दी भइरहने त्रिविमा गल्ती गर्नेहरु पक्राउ पर्ने र कानुनअनुसार कारवाहीको दायरामा आउँदैनन् । दलीय संरक्षणले गुण्डाराज सामु प्रहरी निरिह भएको छ । मुलुकमा दलीय संरक्षणमा अपराध मौलाइरहेको यो एउटा उदाहरण हो । विश्वविद्यालय प्राज्ञिक थलो हो, यहाँ हुने हरेक गलत क्रियाकलापलाई नियन्त्रण नगर्ने हो भने त्रिभुवन विश्वविद्यालय अझँै थलिएर जाने निश्चित छ । त्रिविलाई राम्रो बाटोतिर अघि बढाउन गुण्डाराज अन्त्य गरौँ ।
