पूर्व–पश्चिम महेन्द्र राजमार्गको दाउन्ने खण्ड यात्रुका लागि सास्ती भएको छ । लामो जामको सास्ती एकातिर छ, वर्षा हुँदा हिलाम्मे र हिउँदमा धुलोले यात्रुले व्यहोरिरहेको कठिनाइ धेरै छ । तीन वर्षमा बन्नुपर्ने सडक सात वर्ष नाघ्दा समेत बन्न नसक्दा समस्या भएको छ । समयमै गन्तव्यमा पुग्न नसक्दाका अप्ठ्यारा अनगिन्ती छन् ।
दाउन्नेको १४ किमी सडकको लथालिङ्ग अवस्थाले यात्रुले चरम लापरबाही देखिरहेका छन् । जब तोकिएको समयसीमामा सडक बनाउन सकिदैनथ्यो भने चुरे क्षेत्रको कमजोर भूभागमा सडक खोतल्नु हुँदैनथ्यो । बेलैमा बनाउन पहल गर्दागर्दै हुन नसकेको नभई सुरुदेखि नै ढिलाइ भएको हो । भौगोलिक अवस्थाको हेक्का नराख्नु सडक आयोजना र निर्माण कम्पनीको कमजोरी हो ।
कमजोर भौगोलिक बनोट भएको ठाउँमा सडक निर्माणको काम जटिल हुन्छ भन्ने हेक्का नराखी काम अघि बढाउँदाकै परिणाम अहिले सडक लथालिङ्ग भएको हो । अनेकौँ तगारा हटाउँदै बुटवल–नारायणगढ सडकको दाउन्नेको १४ किमि बाहेक अरु खण्डमा एकतर्फी पक्की लगभग पूरा भएको छ । एकतर्फी सडक पक्की हुँदा यात्रुलाई धेरै सहज भएको छ । सडक निर्माणका लागि काम सुरु गर्ने, तर पूरा नगरी लामो समय अलपत्र राख्ने प्रवृत्ति मौलाउँदाको सास्ती अन्ततः यात्रुले भोग्दै आएका छन् । निर्माण व्यवसायीको कमजोरी एकातिर छन्, अर्कोतिर राज्य संयन्त्रले सडक निर्माणको काम चुस्त र व्यवस्थित बनाउन ध्यान नदिएका कारण समस्या चुलिएको हो । राज्यप्रति गुनासो बढेको हो ।
एशियाली विकास बैंकको ऋण सहयोगमा बन्न लागेको यो सडक चाइना स्टेट कम्पनीले २०७९ साउन २२ गतेसम्म सक्नेगरी २०७५ चैत ८ गते शुरु भएको हो । नारायणगढ–बुटवल सडक खण्ड कुल १ सय १३ किमि हो । बजार क्षेत्रमा सर्भिस लेनसहित ६ लेन, दाउन्ने सडक खण्डमा तीन र अन्य क्षेत्रमा चार लेनको सडक निर्माण हँुदैछ । २२ वटा पुलको निर्माणमध्ये अधिकांश सकिएका छन्, केही बाँकी छन् । एकतर्फी कालोपत्रे गर्ने गरी आवागमनलाई सहज बनाएसँगै दाउन्नेको सास्ती कहिलेसम्म भन्ने प्रश्न उठेको छ । दाउन्नेमा कालोपत्रेको साटो ढलान गर्ने तयारी छ ।
दाउन्नेको सास्तीलाई न्यूनीकरण गर्न पहिरो तत्काल पन्छाउने, वर्षायाममा सडकमा निस्किएको पानी र ट्रक पार्किङ्लाई व्यवस्थापन गर्नु पर्दछ । साँगुरो सडकमा पार्किङ् गरेर चालक सुत्दा आवागमन गर्ने यातायातका साधनलाई असहज भइरहेको छ । दाउन्ने पहाडमा ट्रक रोकेर सुत्ने चालकलाई कानुनअनुसार कारबाहीको दायरामा ल्याउन बेवास्ता हुँदा समस्या बल्झेको हो । प्रहरीको सक्रिय पहलकदमी हुने हो भने लामो जामबाट दाउन्नेलाई मुक्त गर्न सकिन्छ । लुम्बिनी र गण्डकी प्रदेश प्रहरीबिच समन्वय गरी प्रहरी सक्रियता बढाउँदा यात्रुले व्यहोरिरहेको सास्ती हटाउन सकिन्छ ।
