डीबी टण्डन(विजय)- बुटवल । उखरमाउलो गर्मीले वातावरण तातेको छ । केही दिनअघि पूर्वी क्षेत्रमा झुलुक्क देखिएको मनसुन त्यतै अड्किएको छ । पानी नपर्दा तापक्रम ३८ डिग्रीसम्म पुगेको छ । बढ्दो तापक्रमले घरबाहिर निस्कन पनि नसक्ने अवस्था छ ।
अत्यधिक गर्मी बढेपछि बुटवल र आसपासका पालिकाका मात्र नभई छिमेकी मुलुक भारतको सुनौली, गोरखपुरसम्मका सर्वसाधारण नागरिकहरू बुटवल चिडियाखोलास्थित तिनाउ नदीमा पौडी खेलेर गर्मी छल्ने गरेका छन् ।
हुने खानेहरु महँगा स्वीमिङ पुलमा जाने गरे पनि सर्वसाधारणहरु भने तिनाउलगायत अन्य खोला, पोखरीहरुमा पुगेर उखरमाउलो गर्मीबाट राहत पाउने गरेका छन् ।
भारतीयहरु गाडी नै रिजर्भ गरेर दर्जनौंको संख्यामा तिनाउमा पौडी खेल्न आउने गरेका छन् । पौडी खेल्ने क्रममा तिनाउ नदीमा डुबेर हरेक वर्ष मानवीय क्षति हुने गरेको छ । स्थानीय सरकार र सुरक्षा निकायले खोलामा पौडी खेल्ने क्रममा हुन सक्ने दुर्घटना रोक्न ध्यान दिन आवश्यक छ ।
