बुटवल
रुपन्देहीका स्थानीय तहहरुले नीति कार्यक्रम ल्याउने क्रम जारी छ । असार १० गतेभित्र नीति कार्यक्रम पारित गरेर बजेट ल्याउनुपर्ने संवैधानिक प्रावधान अनुसार पालिकाहरुका नीति कार्यत्रम आइरहेका हुन् । यसैबिच बिहीबार रुपन्देहीको बुटवल उप–महानगरपालिका र तिलोत्तमा नगरपालिकाले नीति कार्यक्रम ल्याएका छन् । दुबै पालिकाको नीति कार्यक्रममा शिक्षा, स्वास्थ्य, तथा जनशक्ति व्यवस्थापन मुख्य रुपमा रहेको दुबै पालिकाका प्रमुखहरुले नगरसभामा बताएका हुन् ।
बुटवल उप–महानगरपालिकाले आर्थिक वर्ष २०८२-०८३ का लागि शिक्षा, स्वास्थ्य, सीप तथा रोजगारलाई मुख्य प्राथमिकता दिँदै कृषि, पर्यटन र व्यापारलाई समेत प्राथमिकतामा राखेर नीति तथा कार्यक्रम सार्वजनिक गरेको छ । नगरप्रमुख खेलराज पाण्डेयले बिहीबार नगरसभाको १७औं अधिवेशनमा प्रस्तुत गरेका नीति तथा कार्यक्रमहरूमा बुटवललाई उज्यालो, सफा, सुन्दर, हरियालीसहितको सुरक्षित र समुन्नत शहरको रूपमा विकास गर्ने लक्ष्य लिइएको छ ।
‘समानता, स्वाभिमान र अवसर— बस्न योग्य बुटवल शहर’ भन्ने दीर्घकालीन सोचका साथ सूचना तथा सञ्चार प्रविधिको उच्चतम उपयोगमार्फत् शहरलाई जीवन्त बनाउने योजना पनि प्रस्तुत गरिएको छ ।
‘पढाइसँगै रोजगार कार्यक्रमलाई अघि बढाऔं, युवालाई देशमै रहने वातावरण निर्माण गरौं’ भन्ने नारालाई सार्थक बनाउँदै, स्नातक तथा स्नातकोत्तर तहका युवाहरुलाई ‘ओजिटी’ मा खटाइने र भत्ता उपलब्ध गराइनेछ । निजी क्षेत्रसँग सहकार्य गर्दै समृद्ध बुटवल निर्माण गर्ने योजना सार्वजनिक गरिएको छ ।
यस्ता छन् बुटवलका मुख्य योजना
‘घुमौं बुटवल’ अभियानअन्तर्गत यो आर्थिक वर्षलाई बुटवल भ्रमण वर्ष घोषणा गरिँदैछ । बुटवललाई प्रत्येक क्षेत्रमा पर्यटकीय गन्तव्यको केन्द्रबिन्दु बनाउने दीर्घकालीन उद्देश्य अनुरूप गोष्ठी, सम्मेलन तथा विज्ञहरूको सहभागितामा विभिन्न कार्यक्रम सञ्चालन गरिनेछ । ‘शिक्षामा सबल, बुटवल अब्बल’, ‘छोरी पढाऔं, समाज बनाऔं’ लगायत नाराहरूलाई आत्मसात गर्दै नगर प्रमुख शैक्षिक सुधार कोष मार्फत विपन्न वर्गका बालबालिकालाई छात्रवृत्ति, पोशाक र शैक्षिक सामग्री उपलब्ध गराइनेछ ।
सरकारी तथा निजी विद्यालयका छात्राहरूलाई निःशुल्क सेनेटरी प्याड वितरण गरिनेछ । फरक क्षमता भएका तथा लैङ्गिक अल्पसंख्यक समुदायको क्षमता अभिवृद्धि गर्न सीप विकास तालिम सञ्चालन गरिनेछ ।
‘बाआमासँग नगर प्रमुख कार्यक्रम’, ‘स्वस्थ शरीर, स्वस्थ मन’ अभियान सञ्चालन गरिनेछ । बच्चाहरूलाई नैतिक शिक्षासँग जोड्दै, सुन्दर समाज निर्माण गर्ने अभियान सञ्चालन गरिनेछ ।
चोक–चौतारामा ‘मेयर कार्यक्रम’, ‘मञ्चमा दुई जना भन्दा कमलाई मात्र आसन ग्रहण गर्दा माला हटाऔं’, ‘सामाजिक विकृति हटाऔं, तडकभडक घटाऔं’, ‘बुटवलका सिकान, हाम्रो सान’ जस्ता नाराहरूलाई प्राथमिकता दिइनेछ । विद्यालयस्तरबाटै खेलाडी उत्पादन गर्न प्रतियोगिताहरू सञ्चालन गरिनेछन् ।
नयाँ खेलाडी, प्रशिक्षक, रेफ्री, अम्पायर उत्पादन गरिने र सबै विद्यालयमा पीटी तालिम सञ्चालन गरिनेछ । ‘मेरो टोल म सफा गर्छु’ अभियान सुरु गरिनेछ । हरित शहरको अवधारणाअन्तर्गत ‘एक घर, तीन रुख’ नीति लागू गर्दै आवश्यक अनुदान प्रदान गरिनेछ । ‘के पाइन्छ होइन, के चाहिन्छ ?’ भन्ने कृषि नीति अबलम्बन गरिनेछ । घरेलु मदिरा उत्पादनलाई कानुनी मान्यता दिँदै मौलिक परम्पराको संरक्षण गरिनेछ । सुकुम्बासी र अव्यवस्थित बासोबास गरिरहेका नागरिकप्रति ध्यान दिँदै, ‘लालपुर्जा वितरणबाट उहाँहरूको सम्मान’ भन्ने नारालाई सार्थक बनाउन लालपुर्जा वितरणको कार्यलाई निरन्तरता दिइनेछ ।
पछिल्लो निर्वाचनमा प्रमुख र उपप्रमुख पदमा पराजित उम्मेदवारका लागि ‘नगर प्रमुख उपविजेता कार्यक्रम’ तथा ‘उपप्रमुख उपविजेता कार्यक्रम’ सञ्चालन गरिनेछ । सबै वडाहरूको कार्यसम्पादन मूल्याङ्कन गरी उत्कृष्ट वडालाई सार्वजनिक रूपमा सम्मान गरिने योजना पनि नीति तथा कार्यक्रममा समावेश गरिएको छ ।
जनशक्तिलाई सम्पत्ती मान्दै तिलोत्तमाको नीति कार्यक्रम
तिलोत्तमा नगरपालिकाले आर्थिक वर्ष २०८२-०८३ को नीति तथा कार्यक्रम सार्वजनिक गर्दै युवालाई लक्षित गरी “दक्ष जनशक्ति नै तिलोत्तमाको सम्पत्ति” भन्ने नारालाई अगाडि सारेको छ । नगर प्रमुख रामकृष्ण खाँणले नीति तथा कार्यक्रम सार्वजनिक गर्दै युवाहरुलाई दक्ष बनाउन तालिम, सीप विकास, रोजगारी सिर्जना र उद्यमशीलता प्रवर्धनमा विशेष जोड दिइएको जानकारी दिएका छन् ।
नगरपालिकाले युवा लक्षित प्रविधिमैत्री तालिमहरू सञ्चालन गर्ने, स्वरोजगार कार्यक्रम विस्तार गर्ने, स्टार्टअप र नवप्रवर्तन इनुभेसनमा आधारित परियोजनाहरूमा लगानी बढाउने तथा बेरोजगार युवालाई व्यवसायिक मार्गदर्शन दिने नीति अघि सारेको छ । युवा वर्ग राष्ट्र निर्माणको आधार भएको उल्लेख गर्दै तिलोत्तमाका युवामा भएको क्षमतालाई सीप र प्रविधिको सहायताले आर्थिक उत्पादनमा रूपान्तरण गरिने छ ।
“हाम्रो लक्ष्य तिलोत्तमाका युवालाई आत्मनिर्भर बनाउँदै, नगरको आर्थिक समृद्धिमा सहभागी गराईने भएको छ । यसका साथै, नगरपालिकाले सार्वजनिक निजी साझेदारीमार्फत् युवालाई उत्पादन र सेवा क्षेत्रमा आबद्ध गराउँदै तिलोत्तमा नगरभित्रै रोजगारीको अवसर सिर्जना गर्ने योजना अघि सारेको छ । युवालाई लक्षित यो नीति तथा कार्यक्रमलाई नगरका बौद्धिक, सामाजिक र राजनीतिक वृत्तले स्वागत गरेका छन् । युवा नै परिवर्तनका वाहक हुन् भन्ने सन्देशसहित नगरपालिकाले स्थानीय स्रोत साधनको अधिकतम उपयोग गर्दै समावेशी र दिगो विकासको लक्ष्य लिएको छ ।
