काठमाडौं । चालु आर्थिक वर्ष २०८१/८२ को ११ महिनामा साढे २ खर्बको सामग्री निर्यात भएको छ। भन्सार विभागको तथ्यांक अनुसार साउनदेखि जेठ मसान्तसम्म २ खर्ब ४७ अर्ब ५७ करोड २ लाख रुपैयाँको सामग्री निर्यात भएको हो।
निर्यात गत आवको यसै अवधिको तुलनामा ७७.७७ प्रतिशतले वृद्धि भएको हो। अघिल्लो वर्ष यसै अवधिमा १ खर्ब ३९ अर्ब २६ करोड रुपैयाँ बराबरको वस्तु निर्यात भएको थियो। यस अवधिमा सोयाविन तेलको निर्यात सबैभन्दा धेरै ९३ अर्ब ५१ करोड रुपैयाँ बराबरको भएको छ। यसपछि सूर्यमुखी फुल तेल, कार्पेट अलैंची लगायतका सामग्री निर्यात भएको तथ्यांकमा उल्लेख छ।
यसैगरी जेठ मसान्तसम्म १६ खर्ब ४४ अर्ब ७९ करोड रुपैयाँ बराबरको आयात भएको छ। जुन अघिल्लो आवको यसै अवधिको तुलनामा १३.१५ प्रतिशत बढी हो। गत आवमा १४ खर्ब ५३ अर्ब ७० करोड रुपैयाँ बराबरको वस्तु आयात भएको थियो। निर्यात बढ्दा व्यापार घाटा भने ६ प्रतिशतले मात्र विस्तार भएको छ।
