सुनवल । नवलपरासी जिल्लाको सुनवल नगरपालिका वडा नं. ४ स्थित सुनवल युनाइटेड अंग्रेजी आवासीय मा.वि ले जिसन नवलपरासीको आयोजनामा भएको जिल्ला स्तरीय स्पेलिङ्ग बि प्रतियोगितामा प्रथम हुन सफल विद्यार्थीहरुलाई सम्मान गरेको छ । यही असार ६ गते पश्चिम नवलपरासीको बर्दघाटमा २९ वटा विद्यालयहरुको सहभागितामा भएको स्पेलिङ्ग बि प्रतियोगितामा सुनवल युनाइटेडका विद्यार्थी मान्भी न्यौपाने, सुप्रिम चापागाई र हिमान्सु अर्यालको टोली प्रथम स्थान हासिल गर्न सफल भएको थियो ।
प्रथम स्थान हासिल गरेका विद्यार्थीहरुलाई विद्यालयमा आयोजित एक कार्यक्रमका प्रधानाध्यापक धनराज चापागाईले खादा र माला लगाएर सम्मान गरेका हुन् । सुनवल युनाइटेड स्कूलले गत बर्ष पनि प्याब्सन र जिसन संस्थाले आयोजना गरेका जिल्ला स्तरीय स्पेलिङ्ग बि मा पनि प्रथम स्थान हासिल गर्न सफल भएको प्राचार्य चापागाईले स्मरण गराए । विद्यार्थीहरुको क्षमता, रुचि र उत्सुकतालाई मापन गर्दै उनीहरुलाई विभिन्न अतिरिक्त क्रियाकलापहरुमा प्रशिक्षण दिदै विद्यालयले हरेक क्षेत्रमा विद्यार्थीहरुलाई सहभागी गराउँदै अन्तर्राष्ट्रिय, राष्ट्रिय, प्रदेश जिल्ला, नगर स्तरका विभिन्न प्रतियोगिताहरुमा अग्र स्थानमा रहन सफल भएको विद्यालयले जनाएको छ ।