प्युठान। धारिलो हतियार प्रहारबाट एक महिलाको मृत्यु भएको छ। प्युठानको सरुमारानी गाउँपालिका-३ गोठेरीमा धारिलो हतियार प्रहार गरी एक महिलाको हत्या भएको जिल्ला प्रहारी कार्यालय प्युठानले जनाएको छ।
२८ वर्षीया रुकमनी बरालको घाँटी रेटी हत्या भएको हो। घटनामा संलग्न रहेको आरोपमा रुकमनीका पूर्व-पति ऐरावती गाउँपालिका -२ कात्तिकेका ३० वर्षीय लीला बहादुर बराललाई प्रहरीले नियन्त्रणमा लिएको छ।
स्थानीय दलित महिला सदस्य आशा विकले दिएको जानकारी अनुसार मंगलबार बिहान करिब १०:१० बजेको समयमा रुकमनी बराल सरुमारानी गाउँपालिका-३ गोठेरीस्थित डिला परियारको घरमा बसिरहेको अवस्थामा उनका पूर्व-पति लीला बहादुर बरालले एक्कासी चक्कु प्रहार गरी घाँटी रेटेका थिए ।
घटनाको जानकारी प्राप्त हुनासाथ प्रहरी चौकी बडडाँडा प्युठानबाट प्रहरी सहायक निरीक्षकको कमान्डमा ४ जनाको टोली र ईलाका प्रहरी कार्यालय बिजुवार प्युठानबाट प्रहरी निरीक्षक मिलन पाण्डेको कमान्डमा सोको सहित ५ जनाको टोली घटनास्थलमा खटिएको थियो।प्रहरी श्रोतका अनुसार घटनाबारे थप अनुसन्धान भइरहेको छ।
