किसन ज्ञवाली
नेपाल, जहाँ हिमालका चुचुराले आकाश छुन खोज्छ, बुद्धको शान्तिको सुवासले संसार मुग्ध बनाउँछ, सीताको सत्यताले विश्वास जगाउँछ र जहाँ हरेक ढुंगा, माटो, पानी र पसिनामा सम्भावनाको बिउ रोपिएको छ, त्यो नेपाल आज एक नयाँ युगको ढोका खोल्न तयार छ । तर, सम्भावना एक्लैले पुग्दैन, त्यसलाई मूर्तरूप दिन विराट एकता चाहिन्छ—एक यस्तो एकता, जुन देशलाई बृहत् परिवर्तनको दिशामा अघि बढाउनेछ ।
नेपाल प्राकृतिक सम्पदाले भरिएको, साँस्कृतिक विविधताले सजिएको र सम्भावनाले चम्किरहेको देश हो, जसलाई विश्वको आकर्षक गन्तव्य बनाउने समय यही हो । तर त्यसका लागि राष्ट्रव्यापी विराट एकता, स्थायित्वयुक्त देश भक्त नेतृत्व र स्पष्ट राष्ट्रिय दिशा आवश्यक छ । राजनीतिक स्थायित्व, युवा पुस्ताको ऊर्जा, प्रविधिमा आधारित विकास र प्राकृतिक स्रोतको वैज्ञानिक उपयोगमार्फत् देशलाई आत्मनिर्भर बनाउनु अहिलेको प्रमुख आवश्यकता हो । केपी शर्मा ओलीजस्तो अनुभवी, निडर र राष्ट्रप्रेमी नेतृत्वले मात्र विविधताबिच एकता कायम राख्दै समृद्धिको यात्रामा मुलुकलाई अघि बढाउन सक्छ । मलेसिया, सिङ्गापुर, युएई र चीनले जस्तै दूरदृष्टि र प्रतिबद्ध नेताको अगुवाइमा राष्ट्रको रूपान्तरण सम्भव छ ।
- स्थायित्व र सक्षम नेतृत्वको आधार, बन्न सक्छ केपी ओलिको सक्षम नेतृत्व —दृष्टिकोण स्पष्ट, सिद्धान्तमा अडिग र जनसमर्थनले भरिएको दल—नेकपा एमाले । आजको अस्थिर र द्विविधामा रुमलियको राजनीतिक परिवेशमा केपी शर्मा ओलीजस्तो दूरदर्शी, निडर र राष्ट्रवादी नेताको आवश्यकता झन् बढेको छ । उनका निर्णयहरू सुसंगठित र राष्ट्रहितमा केन्द्रित छन्, जुन दीर्घकालीन स्थायित्वका लागि अनिवार्य छ ।
- नेपालका भौगोलिक र प्राकृतिक स्रोतः समृद्धिको आधारशिला–
हिमाल, पहाड, तराईले सजिएको नेपाल विश्वमै दुर्लभ भौगोलिक विविधता भएको राष्ट्र हो । जलस्रोत, वनजंगल, खनिज, जडीबुटी—यी सबै सम्पत्तिहरू हामीसँग छन्, तर उपयोगको अभाव छ । यी स्रोतहरूलाई वैज्ञानिक तरिकाले व्यवस्थापन गर्न सक्ने सोंच ओलीसँग छ । उनले अघि सारेका पूर्वाधार विकासका योजना, जस्तै जलविद्युत्, कृषि आधुनिकिकरण, र आन्तरिक पर्यटन प्रवर्धन—यी सबले आत्मनिर्भर नेपालको बाटो देखाउँछ ।
- युवाः राष्ट्र निर्माणका मेरुदण्ड हुन्–
नेपालका युवाहरू जागरूक छन्, देशप्रति भावुक छन्, तर नेतृत्व पाउन आतुर छन् । उनीहरूको क्षमता, ऊर्जा र सपना नीतिमा रूपान्तरण गर्न अनुभवी नेतृत्व आवश्यक छ । ओलीको नेतृत्वमा युवालाई अवसर र दिशा दिन सकिन्छ–नेतृत्वमा सहभागी गराउँदै, देशभित्रै रोजगारीको वातावरण सिर्जना गर्दै, प्रविधिमा दक्षता अभिवृद्धि गर्दै । प्रविधि, सीप र ज्ञानमै आधारित भविष्य निर्माणको माहायज्ञमा युवाहरूलाई सामेल गराउनु छ । यो २१औँ शताब्दी प्रविधिको युग हो । केवल कच्चा श्रम होइन, अब ज्ञानयुक्त श्रमशक्ति आवश्यक छ । ओलीको सोंचअनुसार आधुनिक प्रविधि, अनुसन्धान र सूचना प्रविधिमा नेपालको उपस्थिति आवश्यक छ । त्यसका लागि नीतिगत रूपान्तरण, सीपमूलक शिक्षा र निजी क्षेत्रको सहकार्य अपरिहार्य छन् । आत्मनिर्भरता अब सम्भव छ, यदि प्रविधिलाई अंगालिन्छ भने ।
-अन्तर्राष्ट्रिय उदाहरण नेपाल पनि बन्न सक्छ !
मलेसिया, सिङ्गापुर, युएई, चीन—यी मुलुकहरू पनि कुनै बेला हाम्रो जस्तै संघर्षशील थिए । उनीहरूलाई मार्गदर्शन दिने नेताहरू थिए—महाथिर मोहम्मद, लि क्वान यु, देङ स्याओ पिङ, शेख जायेद । आज नेपालसँग पनि त्यो अवसर छ, त्यो क्षण छ, त्यो सम्भावना छ । अब चाहिएको छ–त्यो नेतृत्व जसले मुलुकको दिशा परिवर्तन गर्न सक्छ । त्यो नेतृत्व ओलीमा देखिन्छ ।
- विविधता भित्रको विराट एकता–
नेपाल बहुजातीय, बहुभाषिक, बहुधार्मिक र बहुसाँस्कृतिक मुलुक हो । यही विविधता हाम्रो शक्ति हो, कमजोरी होइन । अब दलगत र गुटगत राजनीति होइन, राष्ट्रगत भावना आवश्यक छ । ओलीले ‘पहिले देश, पछि दल’ को सन्देश दिनसक्छन् । सबै नेपालीलाई एउटै सूत्रमा बाँध्ने बेला यही हो । त्यो विविधताभित्रको एकताको डोरि केपी ओलीलाई राम्रोसँग थाहा छ, त्यो भनेको सुखी नेपाली समृद्ध नेपालको राष्ट्रिय आकंक्षा हो । सुख हो, शान्ति हो, समृद्धि हो, रोजगारी हो, समानता हो, प्रत्येक नागरिकको आत्म सम्मान हो ।
- राष्ट्रसेवामा समर्पित नेतृत्व–
केपी शर्मा ओली कुनै चकमक भाषणका नेता होइनन् । उनीसँग कार्यान्वयनको इतिहास छ, जनताको मर्म बुझ्ने आँखा छ । उनलाई व्यक्तिगत स्वार्थभन्दा पनि राष्ट्रको उज्यालो भविष्य प्रिय छ । नेपालको मेचीदेखि माहाकालीसम्म, हिमालदेखि तराईको हावा–पानी, पाखा–पखेराको प्रत्येक स्पन्दन–स्पन्दनको जानकारी उहाँमा छ । अबको आवश्यकता उनको मिसन, भिजन र गोलमा नेतृत्वलाई सशक्त साथ दिनु हो ।
निष्कर्षः
अब समय आयो–हामी सबैले हातेमालो गर्ने । जात, भाषा, धर्म र भूगोलभन्दा माथि उठेर एकजुट हुने । प्रविधि, सीप, विचार र श्रमलाई राष्ट्र निर्माणमा लगाउने । हाम्रै पुस्ताले बनाउने हो–विश्व समुदायको गन्तव्य नेपाल ।
मलेसियालाई महाथिरले बनाए,
सिङ्गापुरलाई लि क्वान युले बनाए,
चीनलाई देङ स्याओ पिङले बनाए,
युएईलाई शेख जायेदले बनाए,
अब नेपाल बनाउने जिम्मेवारी ओलीको नेतृत्वमा हामी युवाहरूको काँधमा आएको छ । आउँ, समृद्ध नेपालको सपना साकार बनाऔं ।
विराट एकताको संकल्प गरौं !
समृद्ध नेपाल, सुखी नेपाली
विश्वको आकर्षणः नव नेपाल
(लेखक ज्ञवाली नेकपा एमाले बुटवलका निवर्तमान अध्यक्ष तथा रूपन्देहीका नेता हुन् ।)
