आर्थिक वर्ष २०८१-०८२ मा सात सय वटा नयाँ उद्योग दर्ता भएका छन् । यो संख्या अहिलेसम्मकै उच्च हो । यसअघिका २० वर्षमा वार्षिक सरदर तीन सय वटा उद्योग दर्ता हुने गरेकोमा गत वर्ष यो संख्या दोब्बरभन्दा बढी देखिएको छ । सरकारले नीतिगत सुधार गरेपछि औद्योगिक वातावरण बनेको छ । गत आर्थिक वर्ष दर्ता भएको उद्योगको संख्या हेर्दा मुलुकमा लगानी गर्न व्यवसायी उत्साहित भएको देखिएको हो ।
सरकारले गत वर्ष पुराना कानुनहरूको संशोधन तथा प्रक्रियागत झन्झट हटाउन गरेका कामले अहिले नतिजा देखिन थालेको छ । आर्थिक वर्ष २०८१ को लगानी सम्मेलनअघि आठ वटा अर्थकेन्द्रित कानुनहरू संशोधन गरिएका थिए । त्यस्तै, २०८१ पुस महिनामा १३ वटा कानुन संशोधन भए । अहिले देखिएको उत्साह यिनै कानुनको सुधारले हो । सरकारले गत बैशाखमा ५० करोड रुपैयाँसम्मको विदेशी लगानी स्वचालित मार्गबाट सरकारी कार्यालयमा भौतिक उपस्थितिबिना नै दर्ता गर्न सकिने र आइसिटी क्षेत्रमा न्यूनतम विदेशी लगानीको सीमा नलाग्ने व्यवस्था गरेको थियो । जसले सबैभन्दा उत्साह सूचना प्रविधि क्षेत्रमा देखिएको छ । नेपाली बजार सानो हुने र विदेशी बजारमा आफ्नो पहुँच विस्तारका लागि केही लगानी गर्नुपर्ने आइटी उद्यमीहरूको माग थियो । यो मागलाई पूरा गरेर सरकारले लगानी ल्याउने मात्रै होइन, विदेशमा कमाएको पैसा सहजै ल्याउने वातावरण तयार पार्नु सकारात्मक छ । सरकारले गरेका मुख्य तीन काम–स्वचालित मार्गबाट उद्योग दर्ता तथा आइसिटी क्षेत्रलाई विदेशी लगानीको न्यूनतम सीमा लागू नहुने व्यवस्था, शाखा वा सम्पर्क कार्यालय खोल्नका लागि विदेशमा लगानी खुला र केही कर प्रोत्साहनका कारणले पनि यस क्षेत्रमा आकर्षण बढेको देखिन्छ ।
तर सरकारले गर्नुपर्ने काम अझै धेरै छन् । कानुनमा सुधार भएको छ, तर कानुनले तोकेको काम गर्ने नियमावली र कार्यविधि अझै बन्न नसक्नुले ढिलासुस्ती छर्लङ्ग देखिन्छ । पुसमा आएको लगानी कानुनको भावअनुसार अझै कार्यविधि तथा निर्देशिकाहरू बनेका छैनन् । कार्यविधि र नियमावली तयार गर्न मन्त्रालयहरु किन ढिलासुस्ती गरिरहेका छन् ? नीतिगत सुधारको प्रस्थानविन्दु मानेर निरन्तर मातहतको निकायलाई क्रियाशिल बनाउन मन्त्रालय तहबाट काम हुनुपर्छ । सरकारले समृद्ध मुलुकको सपना साकार पार्न समृद्धि नेपाल सुखी नेपालीको संकल्प गरेकाले औद्योगिक लगानीको वातावरणलाई व्यवहारमा उर्तान अहिलेको काम गर्ने शैलीमा धेरै परिवर्तन गर्न आवश्यक छ । नीतिगत सुधार एकातिर छँदैछ, अर्कोतिर कर्मचारी संयन्त्रको काम गर्ने शैली, आचरण र व्यवहारमा पनि सुधारको खाँचो छ ।
