काठमाडौं । खडेरीको सामना गरिरहेको मधेस प्रदेशलाई संघीय सरकारले संकटग्रस्त क्षेत्र घोषणा गरेको छ ।
प्रधानमन्त्री निवास बालुवाटारमा बसेको मन्त्रिपरिषद् बैठकले मधेसका आठ जिल्लालाई संकटग्रस्त क्षेत्र घोषणा गरेको कानुन, न्याय तथा संसदीय मामिलामन्त्री अजय चौरासियाले जानकारी दिए ।
“अन्न भण्डारको रूपमा चिनिएको मधेस प्रदेशमा खानेपानी र सिँचाइको चरम अभाव हुँदा जनजीवन संकटग्रस्त बनेको छ । त्यसैले, मन्त्रिपरिषद्को निर्णयबाटै सरकारले मधेस प्रदेशलाई संकटग्रस्त क्षेत्र घोषणा गरेको छ,” मन्त्री चौरासियाले भने, “अब सरकारले खानेपानी र सिँचाइका लागि आवश्यक प्रबन्धका लागि हर प्रयत्न अघि बढाउनेछ ।” मन्त्री चौरासियाले सरकारले सम्भव सबै प्रक्रिया अपनाएर समस्या सम्बोधनको प्रयास गर्ने बताए ।
“अब डिप बोरिङ, नदीनालाबाट पम्प गरी पानी तानेर सिँचाइको प्रबन्धसहितका सबै प्रयास अघि बढाउँछ,” चौरासियाले भने, “खानेपानीका लागि तत्काल ट्यांकरमार्फत र दीर्घकालमा वैकल्पिक व्यवस्थामार्फत प्रबन्धको प्रयत्न अघि बढाउँछ ।”
