शान्तिका अग्रदुत गौतमबुद्धको जन्मभूमि लुम्बिनी संसारभरका बौद्धमार्गीहरूको आस्थाको केन्द्र हो । शान्ति र अहिंसाका प्रवर्तक गौतमबुद्ध बौद्ध धर्मावलम्बीका लागि मात्र नभई संसारभरका अहिंसा र शान्तिप्रेमीहरुका आस्थाका धरोहर हुन् । यसैले संसारभरको ध्यान लुम्बिनीमा तानिन्छ ।
संसारले चिहाइरहेको लुम्बिनी अहिले अशान्त छ । अशान्त लुम्बिनीलाई शान्त बनाउन पहलकदमी भएको छैन । जिम्मेवारी लिएर अशान्त लुम्बिनीलाई शान्त बनाउने प्रयत्न नहुँदा गलत सन्देश प्रवाह भइरहेको छ । लुम्बिनीप्रति नकरात्मक सन्देश प्रवाह गर्नेहरुलाई बल पुगिरहेको छ । लुम्बिनीमा भइरहेको निरन्तरको धर्ना र जुलुसले नकारात्मक सन्देश प्रवाह भइरहेको छ ।
कर्मचारीहरुले विभिन्न माग राखेर निरन्तर धर्ना गरिरहेका छन् । उनीहरुले प्रक्रिया पुरा गरेर स्थायी गर्नेदेखि विभिन्न माग राखेका छन् । उनीहरुका माग पूरा गर्न सकिने नसकिने बारे बोल्ने कोही भेटिदैन् । कोषका सदस्य सचिवले कार्यकाल नसकिंदै राजीनामा दिएर हिंडेका छन् । उपाध्यक्ष पनि लुम्बिनीमा छैनन् । कोषाध्यक्ष तीन महिनादेखि बिरामी भइ काठमाडौंमा छन् । कोषको विनियमावली—२०७४ ले कोषको कार्यकारी सदस्यसचिवलाई मानेको छ । कोषको कार्यकारी सदस्य सचिवले राजीनामा दिएकाले अब आन्दोलनरत कर्मचारीसँग संवाद कसले गर्ने ? भन्ने प्रश्न उठेको छ ।
अहिले कोषमा ४० स्थायी र १ सय ७७ जना सेवा करारका कर्मचारी छन् । कोषमा मनपरी सेवा करारमा कर्मचारी राख्दा अहिले गलपासो भएको छ । अहिले उनीहरुले प्रक्रिया पु¥याएर स्थायी गर्नुपर्ने भन्दै आन्दोलनमा उत्रेका छन् । कोषका पदाधिकारीले मनपरी ढंगले निकटका व्यक्तिलाई दिएको नियुक्तिले आवश्यकताभन्दा बढी कर्मचारी थुप्रिएका छन् । अहिले तिनै कर्मचारीको आन्दोलनको मारमा लुम्बिनी परेको छ । व्यक्तिगत स्वार्थपूर्तिका लागि गरेको आन्दोलनको असर लुम्बिनीले ब्यहोर्नुपरेको छ । यो बेला कर्मचारीसँग छलफल गरी आन्दोलन स्थगित गर्नु उत्तम उपाय हो । प्रक्रियागत र विधिसम्म माग पूरा गर्न कोषले पहलकदमी लिनुपर्छ । त्यो विषयमा कर्मचारी सहमतिमा आउनुपर्छ ।
लुम्बिनीप्रति विश्वभर नकारात्मक सन्देश प्रवाह भयो भने आगामी दिनमा त्यसको असर देखिने छ । कोषका सदस्य सचिवले राजीनामा दिएकाले कर्मचारीले तत्कालका लागि आन्दोलन स्थगित गरेर अघि बढ्नु नै राम्रो विकल्प हो ।
कोषका पदाधिकारीले समस्या समाधान गर्न नसक्ने अवस्था आए पर्यटन, नागरिक उड्डयन तथा संस्कृति मन्त्रालयले समस्या समाधानको पहलकदमी लिनुपर्छ ।
