भैरहवा । रुपन्देहीको तिलोत्तमा–१५ कोटिहवामा अवस्थित जनउत्थान बचत तथा ऋण सहकारी संस्थाले एक्सेस सिल्भर ब्राण्ड प्राप्त गरेको छ ।
एशियाली ऋण महासंघले २०२५ अगस्ट ७ मा गरेको लेखापरीक्षणबाट विभिन्न ४ वटा आयामहरुमा उत्कृष्ट अंक ल्याउदै सिल्भर ब्राण्ड पाएको हो । आर्थिक बर्ष २०८१।८२ को वार्षिक लेखा परिक्षण प्रतिवेदन अनुसार वित्तीय, सदस्य सेवा, आन्तरिक व्यवसायिकरण तथा सिकाई र वृद्धिको अवस्थालाई सुक्ष्म विश्लेषण र परिक्षण गरि एसिया स्तरीय गुणस्तर सुनिश्चिता एक्सेस सिल्भर ब्राण्ड प्रदान गरेको संस्थाले जनाएको छ ।
ब्राण्ड पाउनुमा जनउत्थान नेपालकै एक मात्र सहकारी हो भने एसियाको दोस्रो हो । विशेष गरि सीमान्तकृत समुदाय र युवा उद्यमीहरुलाई साना व्यवसाय सुरु गर्न र आर्थिक गतिविधिहरुमा संलग्न हुन सशक्त बनाउने नवीन वित्तीय समाधान समेत प्रवाह गर्दै आईरहेको जनउत्थान साकोस सहकारी अभियानको एक रोल मोडल हो । त्यसैगरि इन्डोनेसियाबाट सौन सिबारुङ क्रेडिट युनियनले पनि यस वर्ष को एक्सेस ब्राण्ड प्राप्त गरेको जनउत्थान बचत तथा ऋण सहकारी संस्थाका अध्यक्ष गिरी पुनले जानकारी दिए । पुनका अनुसार यो अवार्ड नेपालबाट पाउने एक मात्र सहकारी हो भने एशियाभरबाट दुईवटा सहकारीले मात्र एक्सेस ब्राण्ड प्राप्त गरेका छन् । यस अघि पनि जनउत्थानले कास्य (ब्रोन्च) अवार्ड पाएको थियो ।
एशियाली ऋण महासंघले यही २०२५ सेप्टेम्बरको १२ तारिखमा फिलिपिन्सको मनिलामा आयोजना हुने एशियाली क्रेडिट युनियन फोरम २०२५ को उद्घाटन समारोहमा एक्सेस ब्राण्डको प्रमाणपत्र प्रदान गर्ने छ ।
सहकारीको २०८२ असार मसान्त सम्मको अवस्थामा कुल सम्पत्ति ४ अर्ब ४४ करोड, शेयर पुजी २८ करोड ४३ लाख, बचत संकलन ३ अर्ब ४४ करोड, ऋण लगानी ३ अर्ब ३३ करोड रहेको छ । ३९ हजार २ सय ३७ सदस्य रहेको संस्थामा जगेडा कोष ४० करोड ४७ लाख, कर्जा जोखिम कोष १२ करोड ५० लाख, तरलता ९० करोड ९३ लाख रहेको छ । जनउत्थानलाई बुझेर एक वर्षमा ४ हजार ९६ सदस्य थपिएको प्रमुख कार्यकारी अधिकृत रन बहादुर थापाले बताए । यस आर्थिक वर्षको दूई सातामा मात्रै ३ सय ५२ जना सदस्य थपिएका छन । संस्थाको उत्कृष्टताले नै विभिन्न अवार्डहरु पाउदै आएका छौ यो अवार्डले थप जिम्मेवारी बोध गराएको बताउदै नेपालका ३० हजार सहकारी मध्ये जनउत्थान अग्रपंक्तिमा रहेको समेत बताए ।
संस्थाको कुल बचतमध्ये नियमित मासिक बचतको हिस्सा ४४ प्रतिशत (१ अर्ब ५१ करोड) रहेको छ । त्यसैगरी धन सिर्जना गर्ने बचतको हिस्सा १५ प्रतिशत, आवधिक बचतको हिस्सा १८ र चालु बचतको हिस्सा २३ प्रतिशत रहेको । संस्थाले प्रति सदस्य ३ लाख देखि ५० लाखसम्म ऋण लगानी गर्ने गरेको छ । जसमध्ये ८ हजार अर्थात ७४ प्रतिशत ऋणी ३ लाख मुनिको दायरामा रहेका छन् । १३४ जना सदस्यले मात्र ५० लाख सम्मको ऋण लिएका छन्
