गौतमबुद्ध अन्तर्राष्ट्रिय विमानस्थलबाट उडान गर्दै आएका तीन विमान कम्पनीले स्थगित गरेको उडान अझै अनिश्चित छ । विमान उडान स्थगित भएपछि यहाँका व्यवसायी आक्रोशित भएका छन् । गौतमबुद्ध विमानस्थलबाट उडान नियमित नहुँदा पर्यटन प्रधद्र्धनको भविष्य देखेर भएको लगानीको जोखिम बढेको छ ।
झण्डै ४० अर्ब लगानीमा बनेको विमानस्थल नियमित नचल्दा राज्यलाई परेको व्ययभार एकातिर छ, व्यवसायीले व्यहोर्नु परेको नोक्सानी पनि उत्तिकै छ । गत कार्तिकदेखि थाई एयर एशिया,फ्लाई दुबई र जजीराले उडान सुरु गरेपछि उत्साहित भएका व्यवसायी अरू विमान कम्पनीले पनि उडान गर्छन् भन्ने विश्वासमा थिए । बौद्धमार्गी बाहुल्य मुलुकका विमान कम्पनीले पनि भैरहवा सिधै उडानमा रुची देखाइरहेको र सरकारले पनि पहल गरिरहेकोले थप उडान हुन्छ भन्ने विश्वास थियो । तर थप विमान कम्पनीले उडान गरेनन् । उडान सुरु गरेका कम्पनीले पनि स्थगित गरेपछि व्यवसायी निराश हुनु स्वाभाविकै हो ।
विमानस्थल चल्नका लागि यहाँ तत्काल श्रम स्विकृतिको लागि कार्यालय आवश्यक पर्छ । मेडिकल जाँच, भिसा सेन्टर, कार्गो र विदेश पढ्न जाने विद्यार्थीको लागि नो अब्जेक्सन सर्टिफिकेट(एनओसी), ठूला ट्राभल एजेन्सीका कार्यालय स्थापना पनि हुनुपर्छ । ती कार्यालय नहुँदा सेवाग्राही काठमाडौं धाउनुपर्ने बाध्यता छ । विमानस्थलमा विमान आए तर विमानस्थल चल्नका लागि चाहिने कार्यालय स्थापनामा ढिलाइ हुनु गैरजिम्मेवार क्रियाकलाप हो ।
मुलुकमा संघीय शासन प्रणाली स्थापना भइसकेको छ, तर केन्द्रीकृत राज्य संरचनाको मनोविज्ञान बदलिन नसक्दा शासन प्रणाली संस्थागत हुन सकेको छैन । काठमाडौं केन्द्रित मनोविज्ञानले पनि गौतमबुद्ध अन्तर्राष्ट्रिय विमानस्थल सञ्चालनमा बाधा पुगेको छ ।
भैरहवा विमानस्थलबाट चढ्ने यात्रु पर्याप्त हुन नदिन काठमाडौं केन्द्रित ठूला ट्राभल एजेन्सीले अन्तर्राष्ट्रिय हवाई टिकटमा कार्टेलिङ गरेका, एयरलाइन्स कम्पनीहरुले भैरहवामा सम्पर्क कार्यालय नखोलेका र स्थानीय ट्राभल एजेन्सीलाई टिकट बेच्न नदिएकाले पनि विमानस्थल चल्न नदिन सेटिङमा काम भइरहेको भन्ने व्यवसायीको दाबी छ । विमानस्थल चलाउनका लागि सरकारले कार्ययोजना बनाएर काम गर्नुपर्छ । पहिलो अहिले स्थगित गरेका कम्पनीलाई पुनः उडान सुरु गराउन पहल गर्ने, दोस्रो बौद्धमार्गी बाहुल्य मुलुकबाट उडान नियमित गर्न पहल लिने, तेस्रो भारतसँग नयाँ हवाई रूट लिन पहलकदमी लिने ।
प्रधानमन्त्रीको आगामी भारत भ्रमाणमा हवाई रूटको विषयमा छलफल र टुंगो लाग्न सक्यो भने मुलुकका लागि उपलब्धिमूलक हुनेछ । हवाई रूट टुंगो नलाग्दा भैरहवा विमानस्थलबाट अन्तराष्ट्रिय उडान सहज नहुने भएकाले सरकारको प्राथमिकता हवाई रूटमै जानुपर्छ ।
