नवलपुर । नवलपुरको कावासोती ८ खरकट्टा पूर्वपश्चिम राजमार्गमा बस दुर्घटना हुँदा १३ जना घाइते भएका छन् ।
जिल्ला प्रहरी कार्यालय नवलपुरका प्रहरी नायव उपरीक्षक मधु नेपालका अनुसार डण्डाबाट नारायणगढतर्फ छुटेको ना ४ ख ७७७६ नम्बरको बस आफै अनियन्त्रित भई दुर्घटना हुँदा १३ जना घाइते भएका हुन् ।
घाइतेहरु मध्ये केहीको चितवनतर्फ र केहीलाई मध्यविन्दु प्रादेशिक अस्पतालमा उपचारको लागि पठाइएको नवलपुर प्रहरीले जनाएको छ । घाइतेहरु मध्यम र सामान्य रहेको जनाएको छ ।
घाइतेहरुलाई उद्दार गरी अस्पताल तर्फ पठाइएको कारण घाइतेहरुको पूरा विवरण आउन बाँकी रहेको प्रहरी नायव उपरीक्षक मधु नेपालले बताए ।
घाइतेहरु मध्ये देवचुली नगरपालिका १४ प्रगतिनगर निवासी ६५ बर्षीय महिला विष्णु विक र चितवनको भरतपुर महानगरपालिका २१ निवासी ७० बर्षीय पुरुष दिपबहादुर भट्टराईको मध्यविन्दु प्रादेशिक अस्पताल डण्डामा उपचार भईरहेको छ ।
त्यसैगरी ७ जनाको कावासोतीमा रहेको नवलपुर अस्पतालमा उपचार भईरहेको छ ।
नवलपुर अस्पतालमा कावासोती ८ निवासी १४ बर्षीय उत्कृष्ठ पोख्रेल, कावासोती ८ कै ६३ बर्षीय राजकुमार सिग्देल, बाराको कैलाली उपमहानगरपालिका १९ निवासी १७ बर्षीय सलमान खान, चितवनको भरतपुर महानगरपालिका ५ निवासी १२ बर्षीया बालिका सदिक्षा वाग्ले, नवलपुरको हुप्सेकोट ४ निवासी २४ बर्षीया स्वेता आले, हुप्सेकोट ४ कै २२ बर्षीया जमुना रेश्मी र ३७ बर्षीया नरमाया आलेको उपचार भईरहेको छ ।
