लुम्बिनी प्रादेशिक अस्पतालले रात्रिकालीन स्वास्थ्य सेवालाई प्रभावकारी बनाउन रात्रिकालीन उपचारमा सहजीकरण गर्ने छुट्टै कर्मचारी व्यवस्थापन गर्नु स्वास्थ्य सेवालाई भरपर्दो र गुणस्तरीय बनाउन चालेको महत्वपूर्ण पाइला हो । रात्रिकालीन सेवालाई गुणस्तरीय र भरपर्दो बनाउन समन्वयका लागि छुट्टै अधिकृत तोकेर अस्पताल प्रशासनले अहिले भइरहेको समन्वयको अभावलाई हटाएर चुस्त बनाउन खोजेको छ । अस्पताल प्रशासनको यो निर्णयले अस्पतालको सेवा गुणस्तरीय हुने आशा गर्न सकिन्छ ।
अस्पतालमा साँझ ८ बजेदेखि बिहान ८ बजेसम्म प्रत्येक दिन फरक–फरक कर्मचारीलाई ड्युटी अधिकृतको रूपमा खटाएर रात्रीकालीन सेवालाई प्रभावकारी बनाउन थालेको छ । अस्पतालले कार्यविधि बनाएर अस्पतालको आकस्मिक कक्ष तथा मेडिकल वार्डमा भर्ना भएका बिरामीको उपचार व्यवस्थापन, रेखदेखसम्बन्धी सहजीकरण, समन्वय तथा अनुगमनको काम ड्युटी अफिसरले गर्नेछन् । ड्युटीमा खट्ने अधिकृतले अस्पताल प्रशासनलाई कामको जानकारी गराउनुपर्नेछ । अस्पतालले प्रदान गरिरहेको सेवालाई गुणस्तरीय र नागरिकमैत्री बनाउन लुम्बिनी प्रादेशिक अस्पतालले गरेको यो निर्णय नेपालमा सम्भवतः पहिलो हो । दिउँसो आउने बिरामीका लागि उपचार सहजीकरण सम्भव भए पनि रातिमा धेरै खालका समस्या हुन्छन् । रगतको अभाव, स्वास्थ्यकर्मीबिच समन्वयको अभाव, विशेषज्ञ डाक्टर आवश्यक भएमा उपलब्ध नहुने र अस्पतालबाट उपलब्ध अन्य सेवाप्रवाहमा हुने ढिलासुस्तीले अस्पतालको विश्वसनीयतामै प्रश्न उठ्न थालेपछि अस्पतालले रात्रिकालीन ड्युटी अधिकृत तोकेर काम थाल्दा अस्पताल प्रशासन बिरामीप्रति जवाफदेही र जिम्मेवार देखिएको छ ।
लुम्बिनी प्रादेशिक अस्पताललाई प्रदेश सरकारले गौरवको आयोजनाको रुपमा पूर्वाधार निर्माणको काम अघि बढाएर धमाधम ६ अर्ब लागतमा १० तले अत्याधुनिक भवन बनाउन थालिएको छ । १२ सय शैयामा अस्पताल विस्तार हुँदैछ । यो राजधानी बाहिरको ठूलो अस्पतालको रुपमा विशेषज्ञ सेवासहितको अस्पताल बन्दैछ । अस्पतालको पूर्वाधार जति राम्रो बन्दैछ, गुणस्तरीय उपचारका लागि मानव संशाधनको प्रयोगमा अहिलेदेखि नै समन्वय आवश्यक छ । अस्पतालको पूर्वाधार मात्रै प्रधान होइन्, पूर्वाधार साधन हो, मानव संशासनको परिचालन राम्रो भएन भने अपेक्षित नतिजा निकाल्न कठिन हुन्छ । अस्पतालको सेवा थपिंदै जाँदा गुणस्तरीय सेवा प्रवाहको अपेक्षा पनि उत्तिकै हुन्छ । गुणस्तरीय सेवा प्रवाहका लागि लुम्बिनी प्रादेशिक अस्पताल अग्रणी बन्दा अरुका लागि पनि अनुकरणीय हुनेछ, जसले यहाँको मात्रै नभएर मुलुककै स्वास्थ्य सेवालाई चुस्त र गुणस्तरीय बनाउन सघाउ पुग्नेछ ।
