बुटवल । ब्रिटिस एजुकेसन ग्रुपको व्यवस्थापनमा सञ्चालित ब्रिटिस ग्रामर स्कुल (नमस्ते एकेडेमी) Rupandehi ले कक्षा–१२ उत्तीर्ण विद्यार्थीहरूको ग्रेजुएसन तथा नवप्रवेशी कक्षा–११ का विद्यार्थीहरूको स्वागत समारोह भव्य रुपमा सम्पन्न गरेको छ । सो समारोह तिलोत्तमा–५, टाइगर प्यालेस बाई सोल्टीमा आयोजना गरिएको हो ।
कार्यक्रम ब्रिटिस एजुकेसन ग्रुपका कन्ट्री डाइरेक्टर तथा विद्यालय प्रमुख अरुणकुमार कँडेलको अध्यक्षता र सिईओ राजन कँडेलको प्रमुख आतिथ्यतामा सम्पन्न भयो । सो अवसरमा विद्यालयका निर्देशक डिल्लीनारायण पाण्डेय, पुष्पा कँडेल, संस्थापक श्यामलाल खरेल, संस्थापक प्राचार्य राजेन्द्र कुँवरलगायतले शुभकामना मन्तव्य व्यक्त गरे ।
प्रमुख अतिथि कँडेलले विद्यालयलाई अन्तर्राष्ट्रिय स्तरको ब्रान्डमा स्थापित गर्न निरन्तर लागिपरेको बताउँदै उत्कृष्ट नतिजाले विद्यालयको गौरव बढाएको उल्लेख गरे । उनले आगामी दिनमा गुणस्तरीय शिक्षामा निरन्तर सुधार गर्ने प्रतिबद्धता समेत व्यक्त गरे ।
कार्यक्रमको पहिलो सत्रमा कक्षा–१२ को ग्रेजुएसन सम्पन्न भएको थियो । यसअन्तर्गत मोफसलमा दोस्रोपटक व्यवस्थापन संकायमा शतप्रतिशत र विज्ञान संकायमा ९६ प्रतिशत नतिजा ल्याउँदै विद्यालय तिलोत्तमा नगरपालिकामा प्रथम बनेको घोषणा गरिएको थियो । प्रमुख अतिथिले गाउन र प्रमाणपत्र वितरण गर्दै विद्यार्थीलाई दिक्षित गरे भने उत्कृष्ट नतिजा दिलाउन योगदान गर्ने शिक्षक तथा कर्मचारीलाई सम्मान गरिएको थियो ।
ग्रेजुएट विद्यार्थी तर्फबाट अनुज पन्थीले र अभिभावक तर्फबाट शोभाखर पोखरेलले मन्तव्य राख्दै ब्रिटिस ग्रामर स्कुललाई मोफसलमा फरक र उत्कृष्ट +२ शिक्षा दिने संस्थाको रुपमा प्रशंसा गरे ।
दोस्रो सत्रमा कक्षा–१२ का विद्यार्थीहरूले नवप्रवेशी कक्षा–११ का विद्यार्थीलाई टीका, खादा र स्वागतपत्रसहित स्वागत गरे । यस अवसरमा विद्यालयका निर्देशक डिल्लीनारायण पाण्डेय, संस्थापक प्राचार्य राजेन्द्र कुँवर र संयोजक दीपक पोखरेलले स्वागत मन्तव्य राखेका थिए ।
कार्यक्रममा ४० भन्दा बढी सांगीतिक प्रस्तुति प्रस्तुत गरिएको थियो । सञ्चालन विद्यार्थी अन्जुम बेगम, विद्या ढकाल, विष्णु यादव, मनिष गैरे र जन्नत इस्लाम खानले गरेका थिए भने प्रशान्त चौधरी र अनुज पन्थीले मन्तव्य राखेका थिए । समारोहमा सहभागी भएका नेपाल प्रहरीका डिआइजी आर. पी. दासले विद्यालयको कार्यक्रममा सहभागी हुन पाउँदा गर्व लागेको बताए ।
