भदौ २३ गते भएको नवयुवा प्रदर्शनमा १९ युवाको प्रहरीको गोली लागेर ज्यान गएपछि र २४ गतेको आगजनी तथा तोडफोडले निराश प्रहरीको मनोबल बढाउन आवश्यक छ । प्रधानमन्त्री शुसीला कार्कीले प्रहरीको मनोबल बढाउने गरी सरकारले काम गर्ने धारणा राख्दै आगजनी र तोडफोड भएका कार्यालयको निरीक्षण गरिसकेकी छन् । गृह तथा कानुनमन्त्री ओमप्रकाश अर्यालले पनि कानुन कार्यान्वयनका लागि प्रहरीको मनोबल बढाउन अपरिहार्य भएको बताएर कार्यभार सम्हालेका छन् ।
अहिले समुदाय तहबाट पनि प्रहरीलाई अप्ठ्यारो परेको बेला साथ दिनुपर्ने आवाज उठ्न थालेको छ । प्रहरी भएमात्रै समुदाय सुरक्षित रहने भएकाले समुदायले चालेको पहलकदमी सकारात्मक मान्नुपर्छ । इतिहासमै यति छोटो समयमा मनोबल कमजोर हुनेगरी प्रहरी रक्षात्मक भयो । खासगरी २३ गते भएको प्रदर्शनमा सुरक्षा तयारी गर्न चुकेको प्रहरी २४ गते प्रधानमन्त्री केपी ओलीले राजीनामा दिएपछि पुरै रक्षात्मक भयो । सिंहदरबार, सर्वोच्च अदालतलगायत विभिन्न सरकारी निकायका साथै शीर्ष नेताहरुको घरमा आगजनी र तोडफोड नियन्त्रण गर्न नसकेको मात्रै नभई आफ्नै चौकी र कार्यालय पनि प्रहरीले जोगाउन सकेन् । प्रहरी जवानहरु हतियार छाडेर ज्यान जोगाउनुपर्ने अवस्थामा पुगे । अझै कतिपय ठाउँमा प्रहरीलाई कुटी कुटी हत्या गरेका घटना पनि भए । अहिले प्रहरीका लुटिएका हतियार क्रमशः फिर्ता हुँदैछन् ।
तर आगजनी भएका गाडीले प्रहरी परिचालनमा समस्या भएको छ । नवनियुक्त गृहमन्त्रीको पहिलो काम प्रहरीलाई तत्काल आवश्यक गाडी व्यवस्थापन गर्न ध्यान दिनुपर्छ । काठमाडौंमा विभिन्न आठ एसपीलाई कमाण्डर तोकेर क्षतिको विवरण संकलन, आगजनीमा संलग्नको पहिचान र खोजी गर्ने काम भइरहेको छ । संकटका बेला प्रहरीले तंग्रिन गरेको प्रयासलाई सबैले सहयोग गरौँ । अहिले १२ हजारभन्दा बढी कैदीबन्दी अहिले जेल बाहिर छन् । ती कैदी बन्दीका कारण सुरक्षा चुनौती थपिएको छ । प्रहरीलाई पूर्ववत अवस्थामा कार्यक्षेत्रमा खटाउने र नियमित काम गर्न सक्यो भने समुदायले सुरक्षित महशुस गर्नेछ । नवयुवाको आन्दोलनमा प्रहरी कहाँ चुक्यो ? छानबिन आयोग गठन गरी त्यसले निकाल्ने निष्कर्षबाट पत्ता लाग्ला । तर अहिले समाजलाई भयरहित वातावरण श्रृजना गर्न प्रहरीले काम गर्ने वातावरण बनाउन सबैले सहयोग गरौँ ।
