जेनजी आन्दोलनका क्रममा देशभरका कारागार र सुधार गृहबाट १४ हजार ५ सय ५५ कैदी बन्दी फरार भएकोमा अझै ८ हजार कैदी बन्दी फरार छन् । विभिन्न अपराधको संलग्नता पुष्टि भई अदालतको आदेश अनुसार सजाय काटिरहेका, अदालतमा मुद्दा चल्दै गरेका र पुपक्र्षका लागि थुनामा रहेका बन्दीहरु एकैपल्ट बाहिर निस्कदा समाज त्रसित बनेको छ । विभिन्न अपराधमा संलग्नहरु खुलेयाम हिंड्दा समाजमा भय श्रृजना भएको छ । फरार भएकामध्ये कतिपय यस्ता व्यक्ति छन्, ती अन्तर्राष्ट्रिय अपराधिक सञ्जालसँग जोडिएका र गम्भीर अपराधमा संलग्न छन् ।
अपराधको सजाय भुक्तान नगरी समाजमा निस्कदा हुने जोखिम सतहमा देखिन छन् । नख्खु कारागारबाट भागेका सन्तलाल तामाङले काभ्रेको पनौतीमा श्रीमतीको हत्या गरे । बलात्कार मुद्दामा जेल परेका सन्तलाल श्रीमती मनिषा तामाङको हत्या गरी पुनः कारागार फर्केका छन् । बलात्कारका दोषी अर्का एक कैदीले जेलबाट भागेकै राति बलात्कारको प्रयास गरेको समाचार पनि आएको छ । राष्ट्रिय स्वतन्त्र पार्टीका सभापति एंव पूर्व गृहमन्त्री रवि लामिछाने नख्खु कारागारबाट भदौ २४ गते दिउँसो बाहिर निस्केपछि कारागारबाट अरु कैदी बन्दी निस्कन थालेका हुन् । कैदी बन्दी निस्कन नख्खु कारागारबाट सुरु भएपछि अन्यत्रबाट पनि निस्के । नेपाली सेनाले २४ गते राति १० बजेबाट सुरक्षाको जिम्मा लिएको सार्वजनिक गरेपछि पनि कैदी बन्दी निस्कन रोकिएनन् । कपिलवस्तुको तौलिहवा कारागारबाट भदौ २५ गते बिहान कैदी बन्दी निस्किए । उनीहरुले कारागारबाट निस्केपछि जिल्ला अदालत तोडफोड र आगजनी गरे । उनीहरुलाई नियन्त्रणमा लिन र आगजनी रोक्न सुरक्षा निकायले कुनै पहलकदमी लिएन् । यद्यपी काठमाडौं र नुवाकोटलगायतमा भाग्दै गरेका कैदी बन्दीलाई नियन्त्रणमा लिन खोज्दा अटेर गर्ने १० जना कैदी बन्दीको ज्यान गयो । पूर्व गृहमन्त्रीले आफूलाई निर्दोष दाबी गर्दै आएका छन्, त्यही दाबीका आधारमा उनी कारागार बाहिर आए । उनको पार्टीको नेतृत्व टिमले नै कारागार पुगेर बाहिर निकाल्यो । यो विषयमा रास्वपा नेतृत्वले आत्म समीक्षा गर्नुपर्छ ।
कारागारबाट भागेका कैदी बन्दीलाई नियन्त्रणमा लिन गृहप्रशासनको प्राथमिकता हुनुपर्छ । मुलुकमा शान्ति सुरक्षाको प्रत्याभूति पहिलो प्राथमिकता हो, नागरिकलाई सुरक्षाको प्रत्याभूति दिनफरा कैदी बन्दीलाई नियन्त्रणमा लिनुपर्छ । उनीहरु नियन्त्रणमा आउन नसक्दा समाजमा अपराधको नयाँ श्रृखंला सुरु हुनेछ, यसले समाजमा भय श्रृजना गर्नेछ । जब समाजमा भय र आतंक हुन्छ, समाजमा आक्रोश र असन्तुष्टि झनै मौलाउँछ । त्यसैले गृहप्रशासनको पहिलो प्राथमिकता फरार कैदी बन्दीलाई कारागारमा फर्काउन हुनुपर्छ ।
