विषम परिस्थितिमा गठन भएको सरकारको पूर्णतामा ढिलाइ भएको छ । मन्त्रिपरिषद्लाई छिटो पूर्णता दिएर समाजमा आशा जगाउने काम गर्न चुनौती छ । प्रशासनिक केन्द्र सिंहदरबारसहित देशभरका दर्जनौं कार्यालयमा तोडफोड र आगजनी भएकाले अहिले राज्य संयन्त्र पूर्णवत अवस्थामा छिटो फर्र्र्काएर नागरिकलाई आशा र विश्वास दिनुपर्ने छ । सरकारले छिटो पूर्णसरकारले राम्रो गरी काम गरेको छ भन्ने समाजमा आशा नजगाउने हो भने मुलुक निराशा र आक्रोशबाट मुक्त हुने सम्भावना न्यून छ ।
नयाँ सरकार गठनसँगै नियुक्त मन्त्रीहरु सिंहदरबारको खरानी पन्छाउँदै काममा लागेका छन् । मन्त्रिपरिषद्मा दुई चरणमा मन्त्रीहरु नियुक्त भएका छन् । प्रधानमन्त्री सुशीला कार्कीले नियुक्त भएको तीन दिनमा तीन मन्त्री नियुक्त गरिन् । त्यसको सातापछि चार मन्त्री नियुक्त गरेकी छन् । ११ सदस्यीय मन्त्रिपरिषद्मा परराष्ट्रसहित केही मन्त्रालय नेतृत्वविहीन छन् । सरकारमा स्वतन्त्र प्रकृतिका व्यक्ति राख्ने भनिएकाले पनि ढिलाइ भएको हुनसक्छ । यद्यपी सञ्चार तथा सूचना प्रविधिमन्त्री जगधिश खरेल नेपाली कांग्रेस दोलखाको क्षेत्रीय प्रतिनिधि भएको सार्वजनिक भएको छ । अरु मन्त्रालयमा जे–जस्ता पात्र आएका छन्, ती पात्रका काम प्रारम्भिक चरणमा ठिकैछन्, तर गृहमन्त्री ओमप्रकाश अर्यालले प्रहरीको गिरेको मनोबल उठाउने काममा ध्यान नदिएको आरोप लाग्न थालेको छ । आफू अहिंसावादी भएकाले प्रहरीलाई अहिंसावादी बन्न उनले दिएको निर्देशन झट्ट सुन्दा आकर्षक भए पनि मनोबल गिरेको प्रहरीका लागि स्वभाविक होइन् । कानुनको कार्यान्वयन ढुक्कसँग गर्न र त्यसबेला समस्या भए आफू साथमा रहेको अभिव्यक्ति दिएको भए मुर्झाएको प्रहरी संगठन जागरूक हुन सक्थ्यो ।
सरकारको प्राथमिकता फागनु २१ गते चुनाव गर्ने हो । चुनाव गर्नका लागि सुरक्षा व्यवस्था चुस्त हुनुपर्छ । जेलबाट भागेका अझै ७ हजार कैदी बन्दी सम्पर्कमा आएका छैनन् । कतिपय अपराधमा संलग्न भइसकेका छन् । आगजनी भएका प्रहरी चौकी मर्मत गरेर धमाधम पुर्नस्थापना गर्न समुदाय नै लागेको छ । समुदायको सक्रियतामा चौकीमा प्रहरी फर्केका छन्, तर उनीहरुका लुटिएका हतियार धेरै भेटिएका छैनन् । समाजमा त्रास बढेको छ । मुलुकलाई त्रासको अवस्थाबाट मुक्त गर्न मनोबल उच्च भएको प्रहरीबाट मात्रै सम्भव छ ।
गृहमन्त्रीको आड भरोसा र विश्वासले मात्रै प्रहरी संगठन गतिशील र सुदृढ बन्न सक्छ । चुनावका लागि प्रहरीको दरिलो साथ र भरोसा हुन आवश्यक छ । चुनाव नै पहिलो प्राथमिकता मानेको सररकारले प्रहरीको मनोबल बढाउने गरी काम गर्नुपर्छ । कैदी बन्दीलाई कारागारमा फर्काउनेदेखि लुटिएका हतियार बरामद गर्न पनि प्रहरीको सक्रियता आवश्यक छ ।
