मुलुकको अर्थतन्त्र र राजनीतिमा मडारिएको कालो बादलले निराशा बढिरहेको बेला रूपन्देहीको एउटा उद्योगले उत्पादन अमेरिका निर्यात गरेको सार्वजनिक भएको छ । रूपन्देहीको शुद्धोधन गाउँपालिकामा पाँच वर्षअघि स्थापना भएको फस्र्ट च्वाइस फुड्सले उत्पादन अमेरिका निर्यात सुरु गरेको छ । यसअघि नेपाली बजारसँगै भारतमा निर्यात गर्दै आइरहेको कम्पनीले तेस्रो मुलुकमा निर्यात गर्न थालेको हो ।
भैरहवा भन्सार कार्यालयबाट दुई वटा कन्टेनर ४२ मेट्रिक टन फ्रेन्च फ्राइज बोकेर कोलकाता बन्दगाहका लागि छुटेका छन् । हिमालयन क्रिस्प र हाम्रो फ्राइज ब्रान्डका फ्रेन्च फ्राइज निर्यात गरेर उद्योगीले एउटा सकारात्मक पहलकदमी लिएका छन् । दुई कन्टेनर उत्पादन निर्यात हुनुले मात्रै परिमाणका हिसाबले ठूलो विषय होइन्, तर सन्देशका हिसाबले महत्वपूर्ण छ । आयातमुखी अर्थतन्त्रमा धानिएको मुलुकमा निर्यातको पहलकदमी लिदा बजार बन्न सक्छ । बजारको खोजी एकैपल्ट ठूलो मात्रामा तयार हुने होइन्, सानै ढंगले हुँदै जाने हो । त्यसो त उद्योगले थप निर्यातको माग पनि लिइसकेको बताइएको छ । अब हरेक हप्ता अमेरिकाका लागि भैरहवा भन्सारबाट फ्रेन्च फ्राइज निर्यात हुने उद्योगका सञ्चालक कृष्ण पौडेलले जानकारी दिए ।
उद्योगले उत्पादन गरेको फ्रेञ्च फ्राइज आलु अहिले नेपालको आन्तरिक बजारमा खपत भइरहेको छ । भारतीय बजारमा निर्यात गरिरहेको उद्योगले अमेरिका निर्यात सुरु गरेसँगै बेलायतका लागि पनि अर्डर आएको छ । फ्रेञ्च फ्राइच खाने बढ्दो प्रचलनले पछिल्ला वर्ष उपभोक्ताको आकर्षण बढेको छ । अहिले नेपालमा खपत भइरहेको मध्ये ७५ प्रतिशत फ्रेञ्च फ्राइजको आयात विस्थापित गर्न सफल यो उद्योगले उद्योगलाई चाहिने आलु उत्पादनमा किसानसँग हातेमालो गरिरहेको छ । किसानलाई आलु खेतीमा प्रोत्साहन कार्यक्रम अघि बढाएर उत्पादनमुखी अर्थतन्त्र निर्माणको लागि सरकारले पहलकदमी लिनुपर्ने हो । उद्योग र किसानलाई जोडेर उत्पादनलाई बढाउने कार्यक्रम राज्यले लिनुपर्नेमा उद्योगीले नै गरेका छन् । किसानको खेतबारीमा पुगेर किसानलाई आलु लगाउन आग्रह गरिरहेका छन् । यो अभियानमा सरकार कतै देखिन सक्दा उद्योगी र किसान सबैले सरकार हुनुको अनुभूति गर्न सक्थे ।
२ अर्ब लगानी भएको उद्योगले नेपालका २६ जिल्लाका करिब ३५ हजार किसानलाई आलु उत्पादनमा जोडेर उनीहरूबाट खरिद गरेको आलु प्रशोधन गरी उद्योगले फ्रेन्च फ्राइजलगायत परिकार उत्पादन गरिरहेको छ । करिब ५ बिघा क्षेत्रफलमा ६० हजार स्क्वायर फिटमा फैलिएको उद्योगले विश्वस्तरीय फ्रोजन पोटाटो प्रोडक्ट र फ्रेन्च फ्राइज उत्पादनसँग प्रतिस्पर्धा गर्न अग्रसर हुनु मुलुककै लागि गौरवको विषय हो । निर्यातमुखी र स्थानीय कच्चा पदार्थबाट उत्पादन हुने यो उद्योगझै अरु उद्योगलाई विभिन्न खालका सुविधा दिएर राज्यले प्रोत्साहन गर्नुपर्छ । सरकारले उद्योगबाट कर असुल्नेमात्रै होइन्, उनीहरुलाई प्रोत्साहन गर्ने र लगानी विस्तारका लागि सहजीकरण गर्दा फाइदा मुलुककै लागि हो ।
