नेपाल प्रहरीको प्रमुखमा प्रहरी अतिरिक्त महानिरीक्षकको बरियतामा एक नम्बरमा रहेका दानबहादुर कार्की नियुक्त भएका छन् । उनले बिहीबारबाट औपचारिक रूपमा संगठनको नेतृत्व सम्हाल्दै छन् ।
कार्की यस्तो बेला महानिरीक्षक भएका छन्, नेपाल प्रहरीको मनोबल इतिहासमै  कमजोर भएको छ । भदौ २३ र २४ गतेको आन्दोलनमा प्रहरीको भूमिकालाई लिएर चौतर्फी प्रहरीप्रति आक्रमण भएको छ नै, अभिभावकीय र मार्गनिर्देशक भूमिकामा रहनुपर्ने सरकारको भूमिका नै प्रहरीप्रति सकारात्मक बन्न सकिरहेको छैन । तालुक गृहमन्त्रालयको कुर्सीमा बसेका मन्त्री ओमप्रकाश अर्याल कतिपय अवस्थामा गृहमन्त्रीको भूमिका, जिम्मेवारी र दायित्व नै बिर्सेर बोलिरहेका छन् । भदौ २३ गतेको गोली प्रहार गरी विद्यार्थीको हत्या गरेको आरोप प्रहरीले खेपिरहेको छ भने २४ गते सुरक्षा व्यवस्था मिलाउन नसकेको र आत्मसमर्पण गरेको आरोप लागेको छ ।

सबै दोषको जिम्मेवार प्रहरीलाई दिइएपछि चौतर्फी आक्रमणको निशानामा परेको प्रहरीको मनोबल खस्कनु स्वाभाविक नै हो । तर प्रहरीको खस्केको मनोबल उठाउनै पर्नेछ, महानिरीक्षक कार्कीले प्रहरी संगठनको खस्केको मनोबल उकास्न सरकारले गर्नुपर्ने कामबारे प्रधानमन्त्रीसहितलाई जिम्मेवारी सम्झाउनुपर्ने छ, समाजका विभिन्न निकाय र संस्थाहरुको भूमिका र सहकार्यले पार्ने प्रभावबारे जानकार कार्कीले तत्काल समुदायसँग सहकार्यको कार्यक्रम ल्याउन आवश्यक छ । प्रहरी समुदायका लागि हो, समुदायसँग दिनहुँजसो मिलेर काम गर्ने भएकाले समुदाय–प्रहरी सहकार्य बलियो नभई हुँदैन । भदौ २३ र २४ गतेको आन्दोलनमा आगजनी भएका काठमाडौंसहित विभिन्न ठाउँका प्रहरी कार्यालय भवन मर्मत र निर्माणमा समुदायको सहभागिताले गर्दा प्रहरीको लागि छिट्टै बास तयार भयो । प्रहरीको लागि मनोबल उकास्नको लागि यो काम महत्वपूर्ण थियो । अब समुदाय माझ सहकार्यलाई अभियानको रूपमा लैजानुपर्छ ।

महानिरीक्षक कार्कीको कार्यकाल २९ महिना लामो छ, यो उनका लागि राम्रो काम देखाउने अवसर हो । अरू महानिरीक्षक झै औषत भएर निस्कने कि संगठनको छवि सुधार्नेदेखि केही नीतिगत र संरचनागत सुधार गरी आफूलाई अब्बल सावित गर्ने उनको परीक्षाको घडी हो । अहिलेसम्म उनको काम अब्बल रहेकाले धेरैले प्रहरीमा धेरै सुधार हुन्छ भन्ने अपेक्षा गरेका, तर राजनीतिक वातावरण त्यस अनुकुल बन्न कठिन रहेको छ । प्रहरीलाई अब साधनस्रोतमा पूर्ण बनाउनुपर्नेछ । सञ्चार उपकरणदेखि गाडी र पोशाकविहीन भएको प्रहरीलाई छिट्टै पूर्ण बनाएर फागुन २१ गतेको चुनावमा शान्ति सुरक्षा चुस्त बनाउनुपर्नेछ ।

जेनजी आन्दोलनबाट पाठ सिकेर प्रहरी अघि बढ्नुपर्छ । कार्कीको नेतृत्वसँगै दुर्गा प्रसाईं समूहले आन्दोलनको घोषणा गरेको छ । समाज अराजक बनिरहेको र प्रहरी साधनस्रोतविहीन बनिरहेको बेला यो चुनौतीको सामना गर्ने सामथ्र्य बढाउनुपर्ने छ । प्रहरी संगठन दबाब र प्रभावबाट थिलोथिलो भएको थियो, अहिले त्यसमा अभाव थपिएको छ । यी तिनै विषयबाट मुक्त गर्ने सामथ्र्य जुटाउन सक्दा कार्कीको कार्यकाल सम्झनलायक हुनेछ ।