बुटवल । विद्यालयको दिगो स्थायित्व र उन्नयनको लागि रुपन्देहीको तिलोत्तमा नगरपालिका वडा नम्बर–१३ को बभनी भूतपूर्व सैनिक आधारभूत विद्यालयले आगामी महिना श्रीमद् भागवत धनधान्याचल विराट ज्ञान महायज्ञ सञ्चालन गर्ने भएको छ । विद्यालयको आर्थिक स्रोतलाई सवलीकरण गरी अंग्रेजी माध्यामबाट पढाइ गराएर गुणस्तरीय शिक्षा प्रदान गर्नको लागि मंसिर १५ गतेदेखि महायज्ञ गर्न लागेको हो ।
विद्यालयले शनिबार पत्रकार सम्मेलन गरी महायज्ञको तयारी तीब्र बनाएको जानकारी दिएको छ । विद्यालयका प्रधानाध्यपक तथा यज्ञ मूल समिति महासचिव मनोजकुमार क्षेत्रीले सामुदायिक विद्यालयको भौतिक र आर्थिक विकासको लागि महायज्ञ सञ्चालनको अभियानमा जुटेको बताए । ८ दिनसम्म सञ्चालन हुने महायज्ञको मुख्य वाचक कथाव्यासी महाराज चैतन्य कृष्ण गुरुजी रहेका छन् ।
महायज्ञबाट सम्पूर्ण खर्च कटाएर झण्डै दुई करोड रुपैयाँ संकलन गर्ने अपेक्षा रहेको प्रअ क्षेत्रीले बताए । महायज्ञको लागि तिलोत्तमा नगरपालिकाबाट ६० लाखको चार कोठे भवन र वडा नम्बर १३ बाट दश लाख रुपैयाँ सहयोगको विद्यालयले सहयोगको अपेक्षा गरिएको यज्ञ मूल समितिका अध्यक्ष रतनबहादुर भण्डारीले जनाए । २०६३ मा स्थापना भएको विद्यालयमा अहिले १३१ जना विद्यार्थी अध्ययनरत छन् । महायज्ञपछि यसलाई कक्षा आठसम्म पु¥याउने लक्ष्य छ । अहिले विद्यालयमा २ जनाको दरबन्दी, १ जना राहत शिक्षासहित ११ जना कर्मचारी कार्यरत छन् । महायज्ञमा दान गर्ने दानवीरलाई सम्मान गरिने आयोजकले बताएका छन् ।
महायज्ञ अवधिमा योग शिविर, रुद्री पाठ पारायण, बाल संस्कार कार्यक्रम, श्रीमद् भागवत दार्शनिक प्रवचन, आरती, भजन किर्तन, तुलादान, भूमिदान, अन्नदान, गौदान, पितृदान, श्रमदान, अर्थदानलगायतका कार्यक्रम हुने आयोजकले बताए । महायज्ञमा भएको दान रकम विद्यार्थीलाई गुणस्तरीय शिक्षा दिन खर्च हुने भएकाले दाताहरुले कहिल्यै पछुताउन नपर्ने प्रधानाध्यापक क्षेत्रीले बताए ।
