पूर्व–पश्चिम महेन्द्र राजमार्गको बुटवल–नारायणगढ सडक खण्ड विस्तारको काम ७६ प्रतिशत पूरा भएको छ । एक वर्षयता तीब्र गतिमा काम भएपछि सडक विस्तारको कामले गति लिएको छ । अब म्याद नथप्ने ढंगले काम भइरहेको बताइएको र विस्तारको काम पनि नतिजा देखिने ढंगले भएकाले अब धेरै आशा गर्न सकिन्छ ।
मुलुकको ‘लाइफलाइन’ हो, महेन्द्रराजमार्ग । यो सडकलाई छिटो सम्पन्न गर्न ढिलाइ भयो । तर असफल आयोजना हुनबाट रोक्न तत्कालीन प्रधानमन्त्री केपी ओली गत वर्ष चीन गएका बेला गरेको पहलकदमीले चिनियाँ निर्माण कम्पनी काम गर्न तयार भयो । र, सडक निर्माण अहिलेको अवस्थामा आइपुगेको हो । एशियाली विकास बैंकको ऋण सहयोगमा निर्माण भइरहेको यो सडक चाइना स्टेट कम्पनीले २०७९ साउन २२ गतेसम्म सक्नेगरी २०७५ चैत ८ गते शुरु भएको हो । नारायणगढ–बुटवल सडक खण्ड कुल १ सय १३ किमि हो । बजार क्षेत्रमा सर्भिस लेनसहित ६ लेन, दाउन्ने सडक खण्डमा तीन र अन्य क्षेत्रमा चार लेनको सडक निर्माण हँुदैछ । २२ वटा पुलको निर्माणमध्ये अधिकांश सकिएका छन्, केही बाँकी छन् । एकतर्फी कालोपत्रे गर्ने गरी आवागमनलाई सहज बनाएसँगै दाउन्नेको सास्ती कहिलेसम्म भन्ने प्रश्न उठेको छ । दाउन्नेमा कालोपत्रेको साटो ढलान कार्य भइरहेको छ । दाउन्ने खण्डलाई नियमित गर्न सके अब सडक करिब तयार भएको छ । पाँच वर्षसम्म सास्ती दिएको यो सडकमा यात्रा गर्नेहरुले सहज अनुभव गर्न थालेका छन् ।
पछिल्लोपल्ट थप भएको समयसीमा २०८३ असारमा सकिन्छ । यो समयसीमामा काम सक्नका लागि प्रयाप्त समय छ । पर्याप्त समय छ भनेर ढिलाइ गर्ने होइन् । कामको गतिमा कमि हुन नदिइ काम गर्दा सडक निर्माण पूरा गर्न सम्भव छ । यो सडक निर्माणको काम बेलैमा सकिएन्, यसले दुःख र सास्ती दियो, तर यसले धेरै पाठ सिकाएको छ । विकास आयोजनाको काम अघि बढाउँदा आइपर्ने जटिलता र समाधान गर्न सकिने उपाय सिकाएको छ । यही सिकाइ बुटवल–गोरूसिंगे सडक निर्माणमा काम लागेको छ । बुटवल–नारायणगढ सडक निर्माणले आम नागरिकलाई आवतजावतमा सहज हुने नै छ, यसले लुम्बिनी र चितवनको पर्यटन प्रवर्धनमा पनि टेवा दिनेछ ।
