भैरहवा
दैनिक ३३ करोड राजस्व संकलनको लक्ष्य पास भएको भैरहवा भन्सार कार्यालयमा भन्सार एजेन्टका कार्मचारीहरु आन्दोलित बन्दा राजस्व संकलन नै प्रभावित बनेको छ । दैनिक ५–६ सय मालवाहक ट्रक भन्सार जाँचपास हुने गरेकोमा सोमबार ४ बजेसम्म एउटा पनि ट्रक भन्सार नभएपछि राजस्वमा असर परेको हो ।
भन्सार ऐनको विरोधमा भन्सार एजेन्टहरुले काम नगर्दा भन्सार कार्यालयलाई मात्र नभई सिंगो देशकै अर्थतन्त्रमा समेत प्रभाव परेको छ । सोमबार बिहानैदेखि भन्सार जाँचपासका लागि एजेन्टहरुले माग नगर्दा यस्को असर राजस्व संकलनमा परेको हो ।
शनिबारदेखि लागु भएको भन्सार ऐन २०८२ को दफा ७१ को (झ) मा घोषणाकर्ताले दफा २० को उप–दफा ३ बमोजिम विद्युतीय माध्यमबाट कम्प्युटर प्रणालीमा वस्तुको विवरण घोषणा गर्दा संलग्न गर्नुपर्ने कागजात फरक रुपमा संलग्न गरेमा त्यस्तो घोषणाकर्तालाई सो घोषणा बमोजिम लाग्ने भन्सार महसुलको दश प्रतिशत जरिवाना र लाग्ने महसुल असुल गरी त्यस्तो वस्तुको जाँचपास गर्ने उल्लेख भएपछि कर्मचारीहरु आन्दोलित भएका हुन् ।
कम्प्युटरमा डाटा इन्ट्री गर्दा हुने सामान्य गल्तीलाई पनि जरीवाना तोकेकोलगायत अन्य केही विषय पनि जोडेर देशैभरीका भन्सार एजेन्टका कर्मचारीहरुले विरोध गर्दै काम ठप्प पारेका छन् ।
सोमबार बिहानैदेखि भैरहवा भन्सार कार्यालयअन्तर्गत रहेका भन्सार एजेन्टहरुले काम ठप्प गरी कुनै पनि प्रज्ञापन कार्यालयमा नपठाई आन्दोलन गरिरहेका छन् । कम्प्युटरमा डाटा इन्ट्री गर्दा हुने सामान्य गल्तीमा पनि ठूलो जरीवाना तोकेकोले यसको प्रत्यक्ष मार एजेन्टमा नपरि कर्मचारीमा पर्ने हुँदा आन्दोलन गर्नुपरेको आन्दोलित कर्मचारीहरुले बताएका छन् ।
भैरहवा भन्सार कार्यालय हुँदै दैनिक ६ सय हाराहारीमा प्रशज्ञापनबाट जाँचपास हुने गरेकोमा सोमबार साँझ ४ बजेसम्म सय जनाको मात्रै प्रज्ञापन आए पनि अन्य कागजात नआउँदा कुनै पनि कारोबार नभएको भैरहवा भन्सार कार्यालयका प्रमुख हरिहर पौडेलले जानकारी दिए ।
उनले भने–‘भन्सारको दैनिक लक्ष्य करिब ३३ करोड छ, आइतबार २७ करोड राजस्व संकलन भए पनि सोमबार ४ बजेसम्म कुनै पनि भन्सार जाँच पास नभएकोले राजस्व उठ्न सकेन । हाम्रो वार्षिक लक्ष्य सोंचेअनुसारको नउठे पनि यो महिनाको लक्ष्य करिब सरदरमा लक्ष्य अनुरुप रहेको छ । यो महिनाको लक्ष्य ८ अर्ब ५९ करोड रहेकोमा आइतबार सम्म ५ अर्ब १ करोड राजस्व संकलन भएको छ ।’
घोषणा गर्दा गल्ती भएमा ऐनकै दफा २० मा जाँचपास गर्नुभन्दा अगावै सच्याउनु पर्ने व्यवस्था रहे पनि कर्मचारीहरुले सामान्य त्रुटीलाई जरिवाना नगर्न माग गरेको भन्सार प्रमुख पौडेलले बताए । भैरहवा भन्सार कार्यालयको यात्रु शाखाबाट भन्सार जाँच पास भएता पनि भित्रबाट जाँचपास भएको छैन । राजस्वमा योगदान गर्ने मुख्य बस्तुहरुको प्रज्ञापन भरे पनि जाँचपास भएको छैन ।
शनिबारदेखि लागु भएको ऐनअनुसार वीरगंजमा आइतबार एक जनालाई यस दफाअनुसार जरिवाना भएपछि विरोध सुरु भएको हो । वीरंगजमा यो प्रकृतिको घटना भएपछि यहाँ पनि हुन सक्ने हुँदा सुधारका लागि अनुरोधार्थ काम नगरेको एजेन्ट कर्मचारीहरुको भनाइ छ । भैरहवा भन्सारमा भने आइतबार दफा ३३ को २ बमोजिमको एक जनालाई जरिवाना भएको थियो ।
कर्मचारीहरुले काम गर्दा कहिलेकाही मानवीय त्रुटीले ठूलो जरिवाना हुँदा आयातकर्ता वा एजेन्टले नब्योहोर्ने हुँदा हामी कर्मचारीमाथि ठूलो आर्थिक असर पर्ने भएकोले यो व्यवस्थामा विचार गर्नुपर्ने बताए । आगामी दिनमा पनि समस्या पर्ने हुँदा यो निणर्य नै खारेज गर्नुपर्ने उनीहरुको माग छ ।
विगत १५ वर्षदेखि एजेन्टको कर्मचारीको रुपमा काम गर्दै आएका राजु बस्नेतले पहिला सहज रुपमा भन्सार भएता पनि अहिलेको ऐनले ल्याएको जरिवानाका कारण व्यापारी मर्ने बताए । सरकारले पहिला मजदुरलाई पलायन गरे, त्यसपछि विद्यार्थी पलायन भए अब उद्योगी व्यवसायीलाई पलायन गर्ने मनसाय राखेको उनले जनाए ।
जरिवाना गर्दा व्यवसायीले नतिरी १५ हजारको तलब खाने कर्मचारीको गल्ती भन्दै जरिवानाको भार बोकाउने भएकोले यहाँ सोमबार कसैले काम नगरेको बस्नेतको भनाइ छ । आज बैठक बस्ने कुरा छ, निर्णय के हुन्छ सम्बोधन नभएसम्म हामी काममा नफर्किने बताए ।
