सन्तोष पौडेल
बर्दिया
बर्दियाको गेरुवा गाउँपालिका–४ गोला स्थित जनता माध्यमिक विद्यालयलाई तीनतारे विद्यालय घोषणा गरिएको छ । २०१७ सालमा स्थापना भएको विद्यालयले खानेपानी, सरसफाइ तथा स्वच्छतासम्बन्धी १० वटा सूचक पूरा गरेपछि गाउँपालिकाले प्रमाणीकरण गर्दै औपचारिक रूपमा तीनतारे घोषणा गरिएको हो ।
लुम्बिनी प्रदेशका सामाजिक विकास मन्त्री जन्मजय तिमिल्सिनाको प्रमुख आतिथ्यतामा आयोजित कार्यक्रममा मन्त्री तिमिल्सिना, गेरुवा गाउँपालिका अध्यक्ष जमानसिंह के.सी. र उपाध्यक्ष लक्ष्मीकुमारी चौधरीले संयुक्त रूपमा विद्यालयका प्रधानाध्यापक प्रकाश रावल तथा विद्यालय व्यवस्थापन समितिका अध्यक्ष रिसु चौधरीलाई तीनतारे प्रमाणीकरण पत्र प्रदान गरेका थिए ।
गेरुवा गाउँपालिकाले विद्यालय खानेपानी, सरसफाइ तथा स्वच्छतासम्बन्धी कार्यविधि निर्माण गरी खानेपानी, शौचालय, सफा–स्वच्छ तथा हरियाली वातावरण, खानाको स्वच्छता, स्वच्छता शिक्षा, महिनावारी स्वच्छता व्यवस्थापन, संस्थागत व्यवस्था र दिगोपना, विपद् जोखिम व्यवस्थापन तथा अनुगमन र जवाफदेहितालगायत १० सूचक निर्धारण गरेको छ ।
वास गेन परियोजनाको सहयोगमा विद्यालयको स्वमूल्याङ्कन र अनुगमनबाट ती सबै सूचक पूरा भएको देखिएपछि प्रमाणीकरण गरिएको प्रधानाध्यापक रावलले बताए । सो अवसरमा विद्यालयलाई तीन तारे घोषणा गर्न सहयोग पु¥याउने व्यक्तिहरूलाई सम्मान समेत गरिएको थियो ।
‘अपाङ्गता भएका बालबालिका तथा किशोर–किशोरीको पहुँच अभिवृद्धि गर्दै समावेशी सिकाइ वातावरण सिर्जना गर्ने र दिगो विकास लक्ष्य–४ को उपलब्धिमा योगदान पु¥याउने उद्देश्यले गेरुवा गाउँपालिकाका विद्यालयहरुमा युके एड र वाटर एडको सहयोगमा नेपाल प्रजनन् स्याहार केन्द्र र राष्ट्रिय अपाङ्ग महासंघ नेपालको प्राविधिक साझेदारीमा वेस संस्थाद्वारा वास गेन्स परियोजना सञ्चालन भइरहेको छ ।
