बुटवल । बुटवल योगीकुटीको  मणिमुकुन्द माध्यमिक विद्यालयले असल अभिभावक उत्प्रेरणा कार्यक्रम सम्पन्न गरेको छ । विद्यार्थीलाई पढाईमा उत्कृष्टता संगै उनीहरुलाई  संस्कारयुक्त र  अनुशासित बनाउन अभिभावकको भूमिकाबारे बुझाउन उत्प्रेरणा कार्यक्रम गरिएको विद्यालयले जनाएको छ । 

कार्यक्रममा बोल्ने वक्ताहरुले विद्यालय र शिक्षक–शिक्षिकाको एक्लो प्रयासले मात्र बालबालिका पढाईमा अब्बल र संस्कारयुक्त नहुने भएकाले अभिभावकको पनि सकारात्मक भूमिका हुनुपर्नेमा जोड दिए । 
कार्यक्रममा मोटिभेसनल प्रशिक्षक कमल सिलवालले बालबालिकाको पहिलो विद्यालय घर र पहिलो शिक्षक आमा बुबा भएकाले घरबाटै बालबालिकालाई संस्कारी र अनुशासित बनाउन सके मात्र उनीहरु पढाई पनि उत्कृष्ट बन्न सक्ने बताए । पछिल्लो समय बालबालिकाहरुमा स्मार्ट मोबाइल फोनको प्रयोगको लत अत्यधीक बढेकाले त्यसलाई कम गराउन अभिभावककै भूमिका हुने सुझाव दिए । बालबालिकालाई हप्कीदप्की र गाली गरेर नभई माया गरेर साथीको व्यवहार गरेर उनीहरुलाई पढाईमा ध्यान केन्द्रीत गर्ने बनाउन सकिने सिलवालले सुझाव दिए । 
अभिभावकले पनि मोबाइलको प्रयोग कम गरेमा बालबालिकाले पनि कम गर्ने र बालबालिकालाई आध्यात्मिक बाटोमा हिंडाउन सके उनीहरु संस्कारी र अनुशासित हुने बताए । 
विद्यालय सञ्चालक समितिका उपाध्यक्ष उमापति न्यौपानेले बालबालिकाको पढाई संगै सर्वाङगीण विकासमा अभिभावकको भूमिका महत्वपूर्ण हुने भएकाले विद्यालयले तीन वर्षदेखि नियमितरुपमा असल अभिभावक उत्प्रेरणा कार्यक्रम सञ्चालन गरिरहेको बताए । 
अभिभावकले बालबालिकालाई परीक्षाको रिजल्टलाई तुलना गरेर निरुत्साहित गर्न नहुने बरु उसको क्षमता र रुची पहिचान गरेर सोही अनुसारको क्षेत्रमा अघि बढ्न प्रेरित गर्नुपर्ने न्यौपानेले बताए । 
बदलिंदो समय र परिवेश अनुसार अभिभावकहरु पनि बदलिएर आफ्ना सन्ततिलाई धन सम्पत्तिले धनी भन्दा समाज र देशका लागि योगदान गर्न सक्ने असल नागरिक बन्न सानै उमेरदेखि सिकाउनुपर्ने न्यापानेले अभिभावकलाई सुझाव दिए । विद्यालय र कलेजको उत्कृष्ट पठनपाठनकै कारण मणिमुकुन्दका विद्यार्थीले एमबीबीएस लगायतका विषयमा उच्च शिक्षा अध्ययनमा पूर्ण छात्रवृत्तिमा यस क्षेत्रमै सबैभन्दा धेरै विद्यार्थीले नाम निकाल्न सफल हुने गरेको न्यौपानेले बताए । 
 कार्यक्रममा विद्यालयका संयोजक हरिप्रसाद पौडेलले संस्कारयुक्त शिक्षा दिएर विद्यार्थी र अभिभावकको विश्वास जित्ने गरी विद्यालय अघि बढेको बताए । 

अभिभावक रेखा बोहरा, सीता पौडेल र रुक्मागत पाण्डेले  विद्यालयले सञ्चालन गर्दै आएको असल अभिभावक उत्प्रेरणा कार्यक्रमले अभिभावकको आफ्ना बालबालिकाप्रतिको जिम्मेवारी र दायित्वबारे थप बुझ्न सहयोग मिलेको र यो कार्यक्रम निकै प्रभावकारी भएको बताए । 
कार्यक्रममा प्ले ग्रुपदेखि कक्षा ३ सम्म र ४देखि कक्षा १० सम्म गरी दुई चरणमा ६ सय बढी अभिभावकलाई प्रशिक्षण दिइएको शिक्षक प्रकाश सुवेदीले जानकारी दिए ।