बुटवल । नेपाल बिलियड्र्स पुल तथा स्नूकर संघ रुपन्देहीको आयोजनामा बुटवलमा हुने नवौं जिल्लास्तरीय खुल्ला स्नूकर प्रतियोगिताको सम्पूर्ण तयारी पुरा भएको छ । बुटवलस्थित खस्यौली स्नूकर क्लबमा पुस १४ सोमबार हुने प्रतियोगिताको खेलतालिका सार्वजनिक गर्दै खेलको सम्पूर्ण तयारी पुरा भएको आयोजकले जनाएको हो ।
एक हप्तासम्म प्रतियोगिता सञ्चालन हुने प्रतियोगितामा १ सय २८ खेलाडी सहभागि भएको संघका अध्यक्ष सुजन पुनले जानकारी दिए । ८ वटा समुहमा १६/१६ खेलाडी रहनेगरि बिभाजन गरि खेल तालिका सार्वजनिक गरिएको उनले बताए । ८ वटा समुह बिजेताका बिचमा क्वाटरफाइनल खेलाईने जानकारी गराए ।
सोमबार हुने उद्घाटन समारोहको बुटवल उपमहानगरपालिका प्रमुख खेलराज पाण्डेयले उद्घाटन गर्नेछन् । खेलहरु बुटवलस्थित खस्यौली स्नूकर क्लबमा हुनेछन् ।
प्रतियोगिताको विजेताले एक लाख, उपविजेताले ५० हजार तथा हाइएस्ट स्कोररले २० हजार,उदियमान खेलाडी र अनुसासित खेलाडीले ५/५ हजार र स्नूकर स्टीक प्राप्त गर्ने छन् । स्नूकरको जिल्लास्तरीय प्रतियोगिताको विजेताले पाउने यो राशी हालसम्मकै सर्वाधिक भएको अध्यक्ष पुनले बताए ।
प्रतियोगिताको निरन्तरता र खेलाडीको प्रोत्साहनमा बुटवल उपमहानगरको आर्थिक सहयोग महत्वपूर्ण रहको अध्यक्ष पुनले बताए । उनले १५ लाख रुपैयां खर्च अनुमान गरिएको प्रतियोगितालाई बुटवल उपमहानगरपालिकाको मुख्य आर्थिक सहयोग रहेको बताए ।
संघले नियमितरुपमा हरेक वर्ष प्रतियोगितालाई निरन्तरता दिएर स्नुकर खेल लाई थप उचाइमा पुराएको महासचिव प्रकाश क्षेत्रीले बताए । प्रतियोगिता सम्पन्न गर्न विभिन्न ६ वटा उपसमितिहरु गठन गरिएको थियो ।
